— सिरहा कारागार प्रकरणको अनुसन्धान गर्न पाँच सदस्यीय छानबिन समिति गठन भएको छ । नेपाल प्रहरीका प्रहरी नायब उपरीक्षक (डीएसपी) को नेतृत्वमा पाँच सदस्यीय छानबिन समिति गठन भएको हो ।
इलाका प्रहरी कार्यालय, लहानका प्रमुखसमेत रहेका डीएसपी विष्णुप्रसाद सोतीको नेतृत्वमा जिल्ला प्रशासन र कारागार कार्यालयका प्रतिनिधिसमेत रहने गरी पाँच सदस्यीय समिति गठन भएको सिरहाका प्रमुख जिल्ला अधिकारी बासुदेव दाहालले जानकारी दिए ।
दाहालका अनुसार, छानबिन समितिले सोमबारदेखि काम थाल्नेछ भने १५ दिनभित्र जिल्ला सुरक्षा समितिमा प्रतिवेदन बुझाउनेछ । छानबिन समितिले बुझाउने अनुसन्धान प्रतिवेदनका आधारमा कानुनी कारवाही प्रक्रिया अघि बढ्ने उनको भनाइ छ ।
सिरहा कारागारभित्रै कारागारका मूलनाइके विजय महतो र नाइके इन्द्रजीत यादव मदिरा खाँदै गरेको तथा मोबाइल चलाउँदै गरेको घटना कान्तिपुरले प्रमाणसहित गत बुधबार सार्वजनिक गरेको थियो । यस्तै, यस कारागारमा पाँच गुणासम्म मूल्यमा लागूऔषधसहित बाहिर पाइने सबै कुरा उपलब्ध हुने तथ्य पनि कान्तिपुरले खुलासा गरेको थियो ।
यसैगरी, पैसा तिरेर कारागारका कैदीहरू बाहिर पनि निस्कन पाउने, फोनका नाममा कैदीबाट मनलाग्दी असुली हुने, कारागारभित्रै पसल खोलेर कैदीहरूमाथि लुट हुँदै आएको, चौकीदार र प्रशासन मिलेर महिनाकै २० लाखबढी उठाउने गरेकोलगायतका विषय पनि समाचारमार्फत् सार्वजनिक भएको थियो ।
सिरहा कारागारमा ४ घण्टा 'सर्च अपरेसन' : सुर्ती, चुरोटलगायतका वस्तु बरामद
