: नेकपा माओवादी केन्द्रका अध्यक्ष तथा पूर्व प्रधानमन्त्री पुष्पकमल दाहाल प्रचण्डले निर्वाचन प्रणालीको स्वरूप परिवर्तन गर्दै प्रत्यक्ष निर्वाचित कार्यकारी राष्ट्रपतिको व्यवस्था ल्याउनुपर्ने बताएका छन् । मकवानपुरको थाहा नगरपालिकास्थित बज्रबारहीमा भएको आइतबार पत्रकारहरुसँग कुराकानी गर्दै अध्यक्ष दाहालले देशमा स्थिरता कायम गर्न प्रत्यक्ष कार्यकारीमा जान संविधान संशोधन गर्न सकिने बताएका हुन् ।
नेपालको निर्वाचन प्रणाली र शासकीय स्वरुप परिवर्तन नभएसम्म देशमा स्थिर शासन र देशको विकास नहुने उनको भनाई छ । ‘अबको व्यवस्थामा सांसदलाई मन्त्री बनाउने व्यवस्था हटाउनुपर्छ । विज्ञ समूहबाट मन्त्री बनाउनुपर्छ’, उनले भने ।
अहिलेको सरकारले प्राप्त अधिकार र उपलब्धिलाई खोस्ने गरी संविधान संशोधन गर्न खोजेको देखिएको भन्दै प्रचण्डले माओवादीले उक्त अवस्था आउन नदिने बताए । सहकारी ठगीको विषयमा सरकारले राजनीतिक रूपमा प्रतिस्पर्धामा रहेको शक्तिलाई कमजोर बनाउने खेलमा सक्रिय भएको उनले आरोप लगाए । आफ्नो र पराईको व्यवहार नगरी ठगीको विषयमा सबै पक्षमा अनुसन्धान हुनुपर्ने दाहालको भनाइ छ ।
