: पाँचथरको हिलिहाङ गाउँपालिका-६ भारपा स्थित मेची राजमार्गमा ट्रक दुर्घटना हुँदा एक जनाको मृत्यु भएको छ। ट्रक चालकसहित दुई जना घाइते भएका छन्।
हिलिहाङ-२ सिंगापुरबाट गोलिया बोकेर झापातर्फ जाँदै गरेको ना ४ ख ७१२३ नम्बरको ट्रक भारपामा दुर्घटना भएको हो। गति अनियन्त्रित हुँदा सडकबाट करिब ५० मिटर तल ट्रक झरेको प्रहरीको भनाइ छ।
दुर्घटनामा परी हिलिहाङ-३ का भवानी शंकर पौडेलको मृत्यु भएको हो। ट्रकमा सवार इलाम सूर्योदय नगरपालिका-१२ निवासी ५२ वर्षीय तेजबहादुर दास र ट्रक चालक झापा चारपाने निवासी ४० वर्षीय राजकुमार बस्नेत गम्भीर घाइते भएका छन्।
घाइतेहरूको पाँचथर अस्पतालमा उपचार सम्भव नभएपछि झापा रेफर गरिएको जिल्ला प्रहरी कार्यालय पाँचथरका प्रहरी निरीक्षक बिनालाल साह तेलीले जानकारी दिए।
