: वन मुद्दामा दाङको राजपुर गाउँपालिका-७ का वडाध्यक्ष पुस्कर वली पक्राउ परेका छन्। वडाध्यक्षसहित ६ जनालाई डिभिजन वन कार्यालय दाङ (देउखुरीले ) पक्राउ गरी अनुसन्धान थालेको छ।
झन्डै दुई वर्ष अगाडि वडाध्यक्षको मिलेमतोमा कानुनी प्रक्रिया बेगर वनका रुख काटेको भन्ने उजुरी अख्तियारमा परेको थियो। त्यस पछि उनीहरूमा अनुसन्धान सुरु भएको थियो। अख्तियारले सत्य तथ्य छानबिन गरी पठाउन डिभिजन वन कार्यालय दाङ (देउखुरी)लाई भनेपछि वन डिभिजनले अनुसन्धान थालेको थियो।
कार्यालयका वन अधिकृत छोटेलाल चौधरीलाई अनुसन्धान अधिकृत तोकेर घटनाको छानबिन थालेको थियो। अनुसन्धानका क्रममा त्यस सामुदायिक वनमा ७४ वटा विभिन्न प्रजातिका रुखहरू काटिएको प्रमाण भेटियो र उक्त कटान भएका काठको परिमाण करिब ३ सय क्युफिट हुन् आउने अनुसन्धान अधिकृत चौधरीको बताए। त्यसमा वडाध्यक्ष सहितको संलग्नता भेटिएको चौधरीले बताए।
सिक्टा गाउँदेखि भित्री सिक्टासम्म विद्युत तार विस्तार गर्दा राप्ती किनार सामुदायिक वनमा तारमुनि परेका साल, ढौंटी, खयर प्रजातिका करिब ७४ वटा स-साना (बल्लाबल्ली साइजका) रुखहरू काटेको उनीहरूलाई आरोप लागेको छ।
वडाध्यक्ष वलीसहित अनुसन्धानमा तानिएकाहरूमा उनका सहोदर दाई घन बहादुर वली, घन बहादुरका छोरा तिलक वली, पदमबहादुर खड्का, भुपलाल बोटे र बालाराम कुमाल रहेका छन्। तीन जनालाई बयानका लागि जिल्ला अदालतमा उपस्थित गराएको र वडाध्यक्ष वली सहित तीन जनालाई बयानका लागि अदालतमा बोलाउँदा आलटाल गरेकोले पक्राउ गर्नु परेको अनुसन्धान अधिकृत चौधरीले बताए।
डिभिजन वन कार्यालयको नियन्त्रणमा रहेका वडाध्यक्ष वलीलाई जिल्ला अदालतमा पेस गरिने तयारी गरिएको छ।
