— अमेरिकी राष्ट्रपतिमा निर्वाचित डोनाल्ड ट्रम्पले अर्बपति इलन मस्कलाई ‘डिपार्टमेन्ट अफ गभर्मेन्ट इफिसियन्सी’ को प्रमुखमा नियुक्त्त गरेका छन् । मस्कले भारतीय मूलका रिपब्लिकन नेता विवेक रामास्वामीसँगको सहकार्यमा सो विभाग सम्हाल्ने ट्रम्पले घोषणा गरेका छन् ।
‘यी दुई अद्भुत् अमेरिकीहरूले विद्यमान सरकारी कर्मचारीतन्त्रको पुन: संरचना गर्न, अधिक नियमन र अनावश्यक खर्च कटौती गर्न र संघीय संरचनाको पुन: गठनका लागि मेरो प्रशासनलाई सहयोग पुर्याउनेछन्,’ ट्रम्पले मंगलबार आफ्नो वक्त्तव्यमा भनेका छन् । उनले मस्कलाई ‘महान’ र रामास्वामीलाई ‘देशभक्त अमेरिकी’ को संज्ञासमेत दिएका छन् ।
ट्रम्पले गत सेप्टेम्बरमा आफ्नो नयाँ आर्थिक योजनाअन्तर्गत गभर्मेन्ट इफिसियन्सी कमिसन स्थापना गर्ने घोषणा गरेका थिए । यस विभागले कसरी काम गर्छ भन्ने स्पष्ट भइसकेको छैन । तर, आफ्नो चुनावी अभियानका क्रममा ट्रम्पले अर्बौं खर्ब सरकारी खर्च कटौतीका लागि कमिसन महत्त्वपूर्ण हुने बताएका थिए ।
गत अगस्टमा सामाजिक सञ्जाल प्लाटफर्म ‘एक्स’मा भएको कुराकानीमा मस्कले ट्रम्पलाई ‘सरकारी कार्यदक्षता आयोग’ गठन गर्न र आफूलाई त्यसमा नियुक्त गर्न सुझाव दिएका थिए । ट्रम्पले त्यतिबेला नै ‘त्यसो गर्न तयार रहेको’ बताएका थिए ।
गत महिना चुनावी र्यालीका क्रममा मस्कले राष्ट्रिय बजेटबाट २ ट्रिलियन डलर खर्च कटौती गर्ने बताएका थिए । अमेरिकी अर्थ मन्त्रालयका अनुसार आर्थिक वर्ष २०२४ मा संघीय सरकारले ६.८ ट्रिलियन डलर खर्च गरेको थियो । सन् २०२२ मा तत्कालीन ट्वििटर खरिद गरेर उल्लेख्य संख्यामा कर्मचारी कटौती गरेका मस्कलाई ट्रम्पले ‘खर्च कटौती सचिव’ भन्ने गरेका छन् ।
