— भारतले नेपाल-बंगलादेश विद्युत् व्यापारले ऊर्जा क्षेत्रमा क्षेत्रीय कनेक्टिभिटी बढाउने जनाएको छ । नेपालले शुक्रबारदेखि औपचारिक रूपमा बंगलादेशलाई बिजुली बेच्न सुरु गरेको छ ।
नेपालका ऊर्जा, जलस्रोत तथा सिंचाइ मन्त्री दीपक खड्का, भारतका विद्युत्मन्त्री मनोहर लाल र बंगलादेशका विद्युत्, ऊर्जा तथा खनिज मन्त्रालयका सल्लाहकार मोहमद फोजुल कबिर खानले भर्चुअल विधिमार्फत संयुक्त रूपमा स्विच अन गरी विद्युत् निर्यातको उद्घाटन गरेका हुन् ।
भारतीय विदेश मन्त्रालयले प्रेस विज्ञप्ति जारी गर्दै भारतको बाटो हुँदै नेपालले बंगलादेशलाई बिजुली बेच्ने कार्यले भविष्यमा ऊर्जा क्षेत्रमा क्षेत्रीय कनेक्टिभिटीलाई बढावा दिने जनाएको हो ।
त्यस्तै भारतीय विद्युत् मन्त्रालयले समेत नेपालबाट बंगलादेश बिजुली निर्यात हुनु ऐतिहासिक क्षण भएको जनाएको छ ।
त्यस्तै नेपालको ऊर्जा, जलस्रोत तथा सिँचाइ मन्त्रालयले पनि नेपालले अमेरिकी डलरमा बिजुली बेच्ने यो पहिलो सम्झौता भएको जनाएको छ । मन्त्रालयले जारी गरेको विज्ञप्तिमा भनिएको छ, 'त्रिपक्षीय ऊर्जा सहकार्यले नेपाल, भारत र बंगलादेशबीच विद्युत् व्यापारको सम्भावनालाई थप विस्तार गरेको छ भने नेपाल, भारत र बंगलादेशबीचको ऊर्जा सहकार्यलाई नयाँ उचाइमा पुर्याएको छ ।'
नेपालबाट ४० मेगावाट विद्युत् भारतीय प्रसारण ग्रिड प्रयोग गरी बंगलादेश लैजानका लागि नेपाल विद्युत् प्राधिकरण, भारतको एनटीपीसी विद्युत व्यापार निगम (एनभीभीएन), बंगलादेश पावर डेभलप्मेन्ट बोर्ड (बीपीडीबी)बीच गत असोज १७ गते त्रिपक्षीय विद्युत् बिक्री सम्झौता भएको थियो ।
तत्कालीन प्रधानमन्त्री पुष्पकमल दाहालको भ्रमणका क्रममा भारतले भारतीय ग्रिड हुँदै बंगलादेशलाई ४० मेगावाट बिजुली बेच्न दिने घोषणा गरेको थियो । उक्त भ्रमणका क्रममा ऊर्जासँगै विस्तृत क्षेत्रीय सहकार्य गर्ने प्रतिबद्धतासमेत दुवै पक्षले जनाएको भारतीय विदेश मन्त्रालयको विज्ञप्तिमा उल्लेख छ ।
नेपालबाट भारत हुँदै बंगलादेशतर्फ विद्युत् निर्यात शुक्रबार मध्याह्न साढे १२ बजेबाट सुरु भएको हो । यस वर्ष (सन् २०२४)को वर्षायाममा विद्युत् निर्यात शुत्रबार राति १२ बजेसम्म मात्र हुनेछ । त्यसपछि आगामी वर्ष सन् २०२५को जुन १५बाट बंगलादेशतर्फ पुनः विद्युत् निर्यात सुरु हुनेछ ।
