— दक्षिण अमेरिकी विश्वकप छनोटमा शनिबार उरुग्वेले कोलम्बियामाथि ३–२ को महत्त्वपूर्ण जित निकालेको छ । यो जितसँगै उरुग्वे कोलम्बियालाई उछिन्दै अंक तालिकाको दोस्रो स्थानमा पुगेको छ ।
उरुग्वेको जित भने नाटकीय रह्यो र उसका लागि म्यानुएल उगारटेले दोस्रो हाफको इन्ज्युरी समयको ११ औं मिनेटमा निर्णायक गोल गरे । यस अगाडि इन्ज्युरी समयकै छैटौं मिनेटमा आन्द्रेस गोमेजले कोलम्बियाका लागि गोल गर्दै खेल बराबरीमा ल्याएका थिए ।
खेलमा अग्रता पनि कोलम्बियाले नै लिएको थियो । जुवान फर्नान्डो क्विन्टेरोले ३१ औं मिनेटमा पहिलो गोल गरे । त्यसपछि ५७ औं मिनेटमा डाभिन्सन सान्चेजले आत्मघाती गोल गरे र उरुग्वेको खेलमा फर्कने क्रम सुरु भएको थियो ।
उसका लागि रोड्रिगो एगुरेले ६० औं मिनेटम गोल गरे । यो नतिजापछि उरुग्वे र कोलम्बियाको समान १९ अंक भएको छ । उरुग्वे गोल अन्तरले अगाडि रहेको हो । अर्जेन्टिना भने २२ अंकमा शीर्षमा छ । ब्राजिल १७ अंकमा चौथो स्थानमा छ ।
