। यूईएफए नेसन्स लिग फुटबल अन्तर्गत भएको खेलमा फ्रान्सले जित निकालेको छ । लिग ए समूह २ अन्तर्गत गएराति भएको खेलमा फ्रान्सले इटालीलाई ३-१ गोलअन्तरले हराएको हो ।
फ्रान्सको जितमा आड्रियन राबियटले दुई गोल गरे भने लुकास डिग्नेको फ्रिकिक प्रहार गोलरक्षकको हातमा लाग्दा आत्मघाती गोल मानिएको थियो । आन्द्रिया कामबियासोले इटालीका लागि एकमात्र गोल गरे ।
खेलको दोस्रो मिनेटमा नै राबियटले गोल गर्दै फ्रान्सलाई अग्रता दिलाएका थिए । लुकास डिग्नेले कर्नरबाट उपलब्ध गराएको बललाई राबियटले हेडिङ गोल गरेका थिए ।
३३औं मिनेटमा डिग्नेकै शानदार फ्रिकिक प्रहार क्रसबारबाट गोलरक्षक भिकारियोको हातमा लागेर गोल भएपछि फ्रान्सले २-० को अग्रता बनाएको थियो । त्यसको दुई मिनेटपछि फेडेरिको डिमार्कोले उपलब्ध गराएको बलमा कामबियासोले गोल गर्दै इटालीलाई खेलमा फर्काउने प्रयास गरे ।
दोस्रो हाफको ६५औं मिनेटमा पुन: डिग्नेकै फ्रिकिकमा राबियटले हेडिङ गर्दै फ्रान्सको ३-१ को जित पक्का गरे ।
यस जितसँगै फ्रान्स ६ खेलमा १३ अंकसहित समूहविजेता बनेको छ । समान अंक भएको इटाली गोलअन्तरमा पछाडि छ ।
दुवै टोली यसअघि नै क्वाटरफाइनलमा प्रवेश गरिसकेका छन् ।
