। पाकिस्तानसँगको तीन खेलको टी-२० अन्तर्राष्ट्रिय क्रिकेट सिरिज अस्ट्रेलियाले क्लिन-स्वीप गरेको छ । सोमबार भएको तेस्रो खेलमा ७ विकेटको जित निकाल्दै अस्ट्रेलियाले सिरिज ३-० ले जितेको हो ।
पाकिस्तानले दिएको ११८ रनको लक्ष्य अस्ट्रेलियाले ११.२ ओभरमा ३ विकेट गुमाएर पूरा गर्यो । अस्ट्रेलियाका मार्कस स्टोइनिसले २७ बलमा ५ चौका र ५ छक्कासहित ६१ रनको अविजित पारी खेले । त्यस्तै जोश इङ्लिसले २७ रन बनाए । जेक फ्रेसर-मेगर्कले १८ रन बनाए ।
पाकिस्तानका लागि अब्बास अफ्रिदी, शाहीन अफ्रिदी र जहानदाद खानले एक-एक विकेट लिए ।
त्यसअघि टस जितेर पहिले ब्याटिङ गरेको पाकिस्तानले १८.१ ओभरमा अलआउट हुँदै ११७ रन बनाएको थियो । बाबर आजमले सर्वाधिक ४१ रन बनाए भने हासिबुल्लाह खानले २४ रन बनाए ।
अस्ट्रेलियाका आरोन हार्डीले ४ ओभरमा २१ रन दिएर ३ विकेट लिए । स्पेन्सर जोनसोन र एडम जाम्पाले २-२ विकेट लिए भने जेभियर बार्टलेट र नेथन एलिसले १-१ विकेट लिए ।
पहिलो खेलमा २९ रनको जित निकालेको अस्ट्रेलियाले दोस्रो खेलमा १३ रनको जित निकालेको थियो ।
त्यसअघि भएको एकदिवसीय श्रृंखलामा पाकिस्तान २-१ ले विजयी भएको थियो ।
