। यस वर्षका ठूला सौन्दर्य प्रतियोगितामा नेपालको उपस्थिति कमजोर देखिएको छ । मिस अर्थ र मिस इन्टरनेसनलमा नेपाल प्रारम्भिक चरणबाटै बाहिरिनुपर्यो । नेपाली समयानुसार आइतबार बिहानको मिस युनिभर्सको प्रतिस्पर्धामा पनि नेपालले ठोस उपलब्धि हासिल गर्न सकेन । अन्तिम ३० मा नेपालले स्थान बनाउन सकेन ।
मेक्सिको सिटीमा आयोजित भव्य ग्राण्ड फिनालेमा डेनमार्ककी भिक्टोरिया जैरले ताज चुम्दा नेपालको प्रतिनिधित्व गरेकी सम्पदा घिमिरे सुरुवाती चरणबाटै बाहिरिइन् । नाइजेरिया फस्ट रनरअप, मेक्सिको सेकेन्ड रनरअप, थाइल्याण्ड थर्ड रनरअप र भेनेजुएला फोर्थ रनरअप घोषित भए । नेपालको राष्ट्रिय गाउन प्रस्तुत गर्ने र परिचय राउण्ड बाहेक नेपालले अघिल्ला चरणबाट आफूलाई उभ्याउन सकेन ।
ग्लोबल ग्ल्यामर भेन्चरले मिस युनिभर्स नेपालको स्वामित्व लिएपछि पहिलोपटक प्रतिनिधि पठाएको हो ।
को हुन् भिक्टोरिया जैर ?
डेनमार्कको राजधानी क्षेत्रको ग्रिब्स्कोभ, सोबोर्गमा सन् २००४ मा जन्मेकी भिक्टोरिया कोपेनहेगनमा हुर्केकी थिइन् । उनले व्यापार र मार्केटिङमा स्नातक डिग्री हासिल गरेकी छन् ।
पेशेवर नर्तकको रूपमा उनले प्रशंसा जितेकी छन् । उनको अबको लक्ष्य एक वकील बन्ने हो । यसबाहेक उनी नियमित रूपमा मानसिक स्वास्थ्य समर्थनको लागि वकालत गर्छिन् । उनी पशु अधिकारका मुद्दालाई पनि समर्थन गर्छिन् र सौन्दर्य उद्यमीको रूपमा काम गर्छिन् ।
उनको सौन्दर्य प्रतियोगिताको यात्रा ‘मिस डेनमार्क’ बाट सुरु भएको थियो । उनले सन् २०२२ मा मिस ग्रान्ड इन्टरनेसनलको टप २० मा प्रवेश गर्दै अन्तर्राष्ट्रिय मान्यता प्राप्त गरिन् । गुडियासँग उनको शरीरको आकार मिल्दोजुल्दो भएका कारणले ‘ह्युमन बार्बी’ पनि भनिन्छ ।
