। यूईएफए नेसन्स लिग फुटबलअन्तर्गत भएको खेलमा स्पेनले रोमाञ्चक जित निकालेको छ । लिग ए समूह ४ अन्तर्गत गएराति भएको खेलमा स्पेनले स्वीट्जरल्याण्डलाई ३-२ गोलअन्तरले हराएको हो ।
स्पेनको जितमा येरेमी पिनो, ब्रायन गिल र ब्रायन जारागोजाले एक-एक गोल गरे । स्वीट्जरल्याण्डका जोएल मोन्टेरो र एण्डी जेकिरीले एक-एक गोल गरे ।
रोमाञ्चक खेलमा स्पेनले दुईपटकसम्म अग्रता लिँदा बराबरीमा फर्किएपछि इन्जुरी समयको पेनाल्टी गोलले खेल जितायो ।
खेलको ३२औं मिनेटमा पिनोले गोल गर्दै स्पेनलाई अग्रता दिलाएपछि पहिलो हाफमा स्पेन १-० ले अगाडि रह्यो ।
दोस्रो हाफको ६३औं मिनेटमा मोन्टेरोले गोल गर्दै खेल बराबरीमा ल्याए । त्यसको पाँच मिनेटमा गिलले गोल गर्दै स्पेनलाई पुनः खेलमा अगाडि ल्याए ।
८५औं मिनेटमा पेनाल्टीमार्फत जेकिरीले गोल गरेपछि खेल २-२ को रोमाञ्चक बराबरीमा आएको थियो ।
तर इन्जुरी समयमा पाएको पेनाल्टीमा जारागोजाले गोल गरेपछि स्पेनको ३-२ को जित सुनिश्चित भएको थियो ।
यसअघि नै क्वाटरफाइनलमा पुग्ने निश्चित भइसकेको स्पेनले ६ खेलमा १३ अंक जोडेको छ । स्वीट्जरल्याण्डको २ अंक मात्र छ ।
पोर्चुगलको क्रोएसियासँग बराबरी
नेसन्स लिग अन्तर्गत लिग ए समूह १ को खेलमा पोर्चुगल भने बराबरीमा रोकिएको छ । खेलमा सुरुवाती अग्रता लिएको पोर्चुगललाई क्रोएसियाले बराबरीमा रोकेको हो ।
खेलको ३३औं मिनेटमा जोआओ फेलिक्सले गोल गर्दै पोर्चुगललाई अग्रता दिलाएका थिए । ६५औं मिनेटमा जोस्को भार्डीओलले गोल गरेपछि पोर्चुगल १-१ को बराबरीमा रोकिएको हो ।
बराबरी खेलेपनि दुवै टोलीको यसअघि नै क्वाटरफाइनलमा स्थान सुरक्षित भइसकेको छ ।
