— दरबारमार्गमा २५ तलासहितको अन्नपूर्ण स्क्वायर निर्माण थालिएको छ । यसअघि होटल अन्नपूर्ण रहेको स्थानमा भाटभटेनी समूह, लिटिल एन्जल्स र अन्नपूर्ण समूहले संयुक्त रूपमा स्क्वायर निर्माण थालेको हो । एक विशेष समारोहबीच सोमबार यसको भूमिपूजा गरियो ।
सुन्दर नेपालको सुन्दरताको प्रतीकका रूपमा स्क्वायर निर्माण थालिएको उद्यमी मीनबहादुर गुरुङले बताए । उनी भाटभटेनी सुपरमार्केटका अध्यक्ष पनि हुन् । ‘भारतको आर्किटेक्चर कम्पनीले यसको डिजाइन गरेको छ,’ उनले भने, ‘दुई चरणमा काम सम्पन्न गर्ने योजना बनाएका छौं । ०८५ वैशाख १ देखि होटल सञ्चालनमा ल्याउने हाम्रो लक्ष्य छ ।’
नौ लाख स्क्वायर फिट क्षेत्रफलमा रहने होटलमा ४० अपार्टमेन्ट हुनेछन् । भाटभटेनीको एउटा स्टोर पनि त्यहाँ रहने जनाइएको छ । कम्तीमा ६ अर्ब रुपैयाँ लगानीमा निर्माण थालिएको होटलसँगै क्यासिनो पनि सञ्चालनमा आउने गुरुङले जनाए । ‘अहिले पुराना संरचना भत्काइरहेका छौं, नगरपालिकाले जति छिटो अनुमति दिन्छ, हामीले त्यति नै छिटो निर्माण थाल्छौं,’ उनले भने ।
साढे तीन सय कोठा रहने यो होटल नेपालकै गौरव गर्न सक्ने संरचनाका रूपमा निर्माण गर्न लागिएको भए पनि मूल्य भने ‘रिजनेवल’ हुने गुरुङले बताए । ‘होटल र आर्केड निर्माण हुन्छ । होटल अलग्गै र आर्केड अलग्गै हुन्छ,’ गुरुङले भने, ‘२५ सय, २ हजार र १५ सय क्षमताका ब्यांक्वेट हल तीन वटा हुनेछन् ।’
आर्केड डेढ वर्ष र होटल साढे दुई वर्षमा निर्माण सकिने पनि गुरुङले जनाए । ‘नेपालमा पनि केही हुन सक्छ भन्ने सन्देश जाओस् भनेर निर्माण थालेका हौं,’ उनले भने, ‘तीन वटा समूह मिलेर निर्माण थालेका हौं । व्यवस्थापन आईटीसीको वेलकम ब्रान्डलाई दिएका छौं । सबै व्यवस्थापन उसैले हेर्छ ।’
