— अमेरिकाका नवनिर्वाचित राष्ट्रपति डोनाल्ड ट्रम्पको चर्चित 'परियोजना २०२५' नामक दस्तावेज लेख्न प्रमुख भूमिका निभाएका टेलिकम क्षेत्रका अधिवक्ता ब्रेन्डन कार अमेरिकाको संघीय सञ्चार आयोगको प्रमुख आयुक्त नियुक्त हुने भएका छन् ।
लामो समयदेखि सोही आयोग र अन्य निकायमा रहेर उनले ट्रम्पका सञ्चार र प्रविधि नीतिको चर्को वकालत गर्दै आएका थिए । कारको नियुक्तिले नवनिर्वाचित राष्ट्रपतिका अर्का अनन्य मित्र, धनाढ्य इलन मस्कलाई भने अझै सहज हुने विज्ञहरूको अनुमान छ ।
एफसीसी भनिने अमेरिकाको संघीय सञ्चार आयोगले टेलिभिजन, रेडियोलगायतका प्रसारण संस्था, टेलिफोन तथा इन्टरनेट सेवा प्रदायकसँगै स्याटेलाइटमा आधारित सञ्चारको नियमन गर्ने निकाय हो । अबको ठ्याक्कै दुई महिनापछि ह्वाइटहाउस प्रवेश गर्ने ट्रम्पले एफसीसीको प्रमुखमा कारलाई नियुक्त गर्ने घोषणा गरेका हुन् । सन् २०१७ यता सोही आयोगको पाँच सदस्यीय आयुक्तमध्ये एक रहँदै आएका कार ठूला प्रविधि कम्पनी र तिनले मिलेमतोमा गर्ने भनिएको दक्षीणपन्थी विचारहरूको सेन्सरको कटु आलोचक रहँदै आएका छन् ।
राष्ट्रपतिमा निर्वाचित ट्रम्पभन्दा चर्को शैलीमा ठूला प्रसारक संस्था र सामाजिक सञ्जाल कम्पनीमाथि प्रश्न गर्ने कार वरिष्ठ रिपब्लिकन पनि हुन् । उनले रिपब्लिकन पार्टीले रुचाउने शैलीमा टेलिकम र सञ्चार क्षेत्रमा नीतिहरू अघि बढाउने ट्रम्पको दस्तावेजमै उल्लेख गरेका छन् । सामाजिक सञ्जाल एक्समा गरिएको एउटा पोस्टमा उनले भनेका छन्, 'संचार क्षेत्रमा कायम सेन्सरसीप नामक कार्टेल र मिलेमतोलाई भत्काउन र सर्वसाधारण अमेरिकीहरूको अभिव्यक्ति स्वतन्त्रतालाई पुनर्स्थापित गर्न जरूरी छ ।' उनले आफ्नो नेतृत्वमा आयोगले अहिले रहेको डीईआईए भनिने विविधता, समता, समावेशिता र पहुँचसम्बन्धी नीतिको पनि अन्त्य गरिने घोषणा गरेका छन् ।
ट्रम्प निर्वाचित हुनेबित्तिकै गरेको पोस्टमा कारले सत्ता परिवर्तन भएपछि ठूला प्रसारण संस्थाहरूले जनचासो, राष्ट्रिय सुरक्षा र आर्थिक वृद्धिका साथै कानुनको पालनामा सघाउने गरी काम गर्ने बताएका थिए । ट्रम्पले उनलाई बारम्बार 'अभिव्यक्ति स्वतन्त्रताका लडाकु' भनेर प्रसंशा गर्ने गरेका छन् । उनले सार्वजनिक रूपमै एबीसी, सीबीएसजस्ता प्रसारण संस्थाको अनुमति पत्र खारेजी गरिनुपर्ने माग गर्ने गरेका छन् । ट्रम्पकै शैलीमा सञ्चार माध्यमको निष्पक्षतामा प्रश्न गर्ने कारले आफू पदमा पुग्दा ठूला प्रविधि कम्पनीको पारदर्शितासमेत सुनिश्चित गरिने बताउँदै आएका छन् ।
ITPF
Sunrise bank
अर्बपति इलन मस्कसँग नजिकको मित्रता रहेका उनले इलनका कतिपय कामको प्रवर्द्धनमा समेत सघाउने गरेका छन् । उनको नेतृत्वमा मस्कका स्टारलिंकजस्ता प्रविधि कम्पनीहरूलाई अझै सजिलो हुने विश्लेषकहरूको दाबी छ । वाल स्ट्रिट जर्नलमा केही समयअघि लेखेको एक लेखमा कारले मस्कको कम्पनीलाई अमेरिकाको दुर्गम क्षेत्रमा सञ्चार सेवा पुर्याउन आफ्नो आयोगले दिने भनिएको झन्डै ९ अर्ब डलरको अनुदान रोक्ने कदमको आलोचना गरेका थिए ।
ट्रम्पको 'परियोजना २०२५' दस्तावेजमा कारले लेखेको अंशमा अमेरिकाको संघीय कानुनको सेक्सन २३० लाई उल्ट्याउनुपर्ने वकालत गरिएको छ । यो सेक्सनले सामाजिक सञ्जाल कम्पनीहरूलाई आफ्ना प्रयोगकर्ताहरूले पोस्ट गरेको कन्टेन्टका लागि जिम्मेवार नबनाइने व्यवस्था गरिएको छ ।
अमेरिकी राष्ट्रपतीय चुनावलगायत अन्य समयमा पनि ठूला प्रसारण संस्था र सामाजिक सञ्जाल कम्पनीले दक्षिणपन्थी विचारलाई अनावश्यक सेन्सर गर्ने र निष्पक्ष स्थान नदिने भन्दै आएका कारको नियुक्तिले अमेरिकाका सञ्चार माध्यम, ठूला प्रविधि कम्पनी र ट्रम्प प्रशासनबीचको तनाव अझै बढ्ने अपेक्षा गर्न सकिन्छ ।
