— हङकङको एक अदालतले त्यहाँका प्रमुख लोकतन्त्रवादी नेता तथा कार्यकर्तालाई देशद्रोहको अभियोगमा १० वर्षसम्मको जेल सजाय सुनाएको छ । उनीहरूलाई राष्ट्रिय सुरक्षासम्बन्धी एक मुद्दामा यसअघि नै दोषी ठहर गरिएको थियो ।
सजाय पाउनेमा बेनी ताई र जोशुआ वङसहित ४५ जना लोकतन्त्र पक्षधर छन् । उनीहरू 'हङकङ-४७' समूहसँग आवद्ध छन् । अदालतले ताईलाई १० वर्ष र वोङलाई ४ वर्षभन्दा बढीको जेल सजाय तोकेको छ । लोकतन्त्र पक्षधरहरूले उनीहरूलाई एक विवादास्पद सुनुवाइपछि दोषी ठहर गरिएको बताएका छन् ।
'हङकङ-४७' समूहले स्थानीय चुनावमा प्रतिपक्षी उम्मेदवारहरू उठाउने तयारी गरेको थियो । त्यस अभियानमा ४७ जना लोकतन्त्र पक्षधर कार्यकर्ता, प्रतिपक्षी सांसद र सर्वसाधारणहरू सहभागी थिए । उनीहरूविरुद्ध ३ वर्षअघि राज्यद्रोहको मुद्दा लगाइएको थियो । उनीहरूले सन् २०२० मा सरकार अपदस्थ गर्न खोजेको अधिकारीहरूको आरोप थियो ।
हङकङमा सन् २०१९ मा भएको व्यापक लोकतान्त्रिक प्रदर्शनपछि चीनले राष्ट्रिय सुरक्षासम्बन्धी कानुन लागू गरेको थियो । 'हङकङ-४७' को मुद्धाको सुनुवाईका क्रममा उक्त कानुनको व्यापक प्रयोग भएको ठानिएको छ । ४७ अभियुक्तमध्ये २ जनालाई भने केही महिनाअघि सफाइ दिइएको थियो ।
अमेरिकाले 'हङकङ-४७' को मुद्धाको सुनुवाइ राजनीतिक रूपमा प्रेरित भएको जनाएको छ । अस्ट्रेलियाले अष्ट्रेलियाले राष्ट्रिय सुरक्षा कानुनको प्रयोगप्रति 'कडा आपत्ति' जनाउँदै आफ्नो एक नागरिक गोर्डन एनजीलाई सजाय सुनाएकोमा 'गम्भीर चासो' उत्पन्न भएको जनाएको छ ।
हङकङ सरकार र बेइजिङले हङकङमा स्थायित्व कायम राख्न राष्ट्रिय सुरक्षा कानुन आवश्यक भएको दाबी गर्दै आएका छन् । उक्त कानुनले हङकङको स्वायत्तता कमजोर नहुने उनीहरूको दाबी छ । पछिल्लो फैसला चीनको राष्ट्रिय सुरक्षा कमजोर पार्न खोज्ने शक्तिका लागि चेतावनी भएको उनीहरुको भनाइ छ ।
