— लिभरपुल मिडफिल्डर डोमिनिक सबोस्लाईले पेनाल्टीबाट गरेको गोलमा हंगेरीले यूईएफ नेसन्स लिगमा मंगलबार जर्मनीलाई १–१ को नाटकीय बराबरीमा रोकेको छ । सबोस्लाईले दोस्रो हाफको इन्ज्युरी समयको नवौं मिनेटमा बराबरी गोल गरेका हुन् ।
जर्मनीले फेलिक्स एनमेचाको गोलले ७६ औं मिनेटमा अग्रता लिएको थियो र जिततर्फ अग्रसर देखिएको थियो ।
बराबरीका बाबजुद जर्मनीले लिग–वान ग्रुप–थ्री जित्ने निश्चित भइसकेको थियो । यसै समूहमा नेदरल्यान्ड्स र बोस्निया एन्ड हर्जगोभिनाले पनि १–१ कै बराबरी खेले ।
यस्तै लिग–बी ग्रुप–वानमा युक्रेनले अल्बानिया तथा चेक गणतन्त्रले जर्जियालाई समान २–१ ले हरायो । लिग–बी ग्रुप–फोरमा मोन्टेनेग्रोले टर्कीलाई ३–१ र वेल्सले आइसल्यान्डलाई ४–१ ले पराजित गर्यो ।
