— विद्युत् कार्यालयको लापर्बाहीका कारण करेन्ट लागेर मृत्यु भएका शुभकालिका-४ का वीरेन्द्र चौलागाईंको आफन्त र नेपाल विद्युत् प्राधिकरण कालिकोट वितरण केन्द्रबीच दुई बुँदे सहमति भएको छ ।
३ नाबालक छोराछोरीको लालनपालनमा सहज बनाउन मृतककी पत्नी पुस्पा पाण्डे चौलागाईंलाई रोजगारी दिने र उचित क्षतिपूर्ति उपलब्ध गराउने सहमति भएको भएपछि सोमबारदेखि थालिएको आन्दोलन स्थगित भएको छ । विद्युत् प्राधिकरणको लापरबाहीले चौलागाईको ज्यान गएको भन्दै मृतकका आफन्त आन्दोलित भएका थिए ।
मंगलबार प्रमुख जिल्ला अधिकारी नारायणप्रसाद भट्टराईको रोहबरमा पीडित र विद्युत्का कर्मचारीबीच सहमति भएपछि मृतकका आफन्तले शव बुझेर दाहसंस्कारको प्रक्रियामा लागेको सुभकालिका- ४ का अगुवा कर्णप्रसाद चौलागाईंले बताए ।
कार्यालयका कर्मचारीले पोल चढ्न लगाएर लापर्बाही गर्दा चौलागाईंको ज्यान गएको भन्दै आफन्तले शव बुझ्न अस्वीकार गर्दै आन्दोलन गर्न सदरमुकाम मान्म आएका थिए।
प्रहरीमा मृतकका बुवा डिल्लीप्रसादले भवितव्य कर्तव्य ज्यानमा जाहेरी दिएर पोस्टमार्टमको कागज लिएको प्रहरी प्रमुख टेककहादुर रावतले बताए । मंगलबार साँझ पोस्टमार्टम भएपछि बुधबार मेल्मस्थित तिला नदीमा दाहसंस्कारका लागि सदरमुकाम मान्मबाट बुधबार बिहान मृतकको शव शुभकालिका लगिएको शुभकालिका-४ का वडाध्यक्ष प्रदीप चौलागाईंले बताए ।
