। पूर्वप्रधानमन्त्री तथा नेपाल समाजवादी पार्टी (नयाँ शक्ति) का संयोजक डा. बाबुराम भट्टराईले प्रधानमन्त्री केपी शर्मा ओलीलाई ज्येष्ठ नागरिकका लागि छुट्टै उपचारको व्यवस्था गर्न प्रस्ताव गरेका छन् ।
भट्टराईले सामाजिक सञ्जाल मार्फत छुट्टै ज्येष्ठ नागरिक अस्पताल तथा त्यो नभएसम्म सबै अस्पतालहरूमा छुट्टै वार्डहरूको व्यवस्था गर्न प्रस्ताव गरेका हुन् ।
प्रधानमन्त्री ओलीले शनिबार आफ्नो बुवालाई फोक्सोसम्बन्धी समस्या भएर त्रिभुवन विश्वविद्यालय शिक्षण अस्पताल महाराजगञ्जमा उपचार भइरहेको तस्वीर सार्वजनिक गरेका थिए । ओलीका अनुसार उनका बुवा मोहनप्रसाद शर्माको स्वास्थ्य अवस्था सामान्य छ ।
भट्टराईले ओलीका बुवाको स्वास्थ्यलाभको कामना गर्दै आफ्ना ९५ वर्षीय बुवालाई पनि आजै वीर अस्पताल भर्ना गरेको उल्लेख गरेका छन् ।
‘हामी नेपालीहरूको पनि औसत आयु क्रमशः बढ्दै गएको र ज्येष्ठ नागरिकहरूको संख्या स्वत: बढ्दै जाने अवस्थामा छुट्टै ज्येष्ठ नागरिक अस्पताल अथवा त्यो नभएसम्म सबै अस्पतालहरूमा छुट्टै वार्डको व्यवस्था गरौं न’ प्रधानमन्त्री ओलीलाई भट्टराईको प्रस्ताव छ ।
