— नेपाल प्रिमियर लिग (एनपीएल) क्रिकेटको उत्कृष्ट नेपाली खेलाडीले कार पुरस्कार पाउने भएका छन् । नेपाल क्रिकेट संघ (क्यान) को आयोजनामा शनिबारदेखि कीर्तिपुरस्थित त्रिवि मैदानमा एनपीएल सुरु हुनेछ । पुस ६ गते हुने फाइनलले कार पाउने खेलाडीको टुंगो लगाउने छ ।
यसका लागि एसपीजी अटोमोबाइल्सले मंगलबार क्यानसँग सम्झौता गरेको छ । चीनको ओमोडा एन्ड जेइको अटोमोबाइल्सको नेपालका लागि आधिकारिक वितरक एसपीजी अटोमोबाइल्स हो ।
एसपीजीका निर्देशक गौरव शारडा र क्यानका सचिव पारस खड्काले सम्झौतापत्रमा हस्ताक्षर गरे । सम्झौताअनुरुप एसपीजी अटोमोबाइल्स एनपीएलको सहप्रायोजकको रूपमा रहनेछ ।
‘एनपीएलका उत्कृष्ट नेपाली खेलाडीले एसपीजी अटोमोबाइल्सबाट पुरस्कारमा कार पाउनेछन्,’ क्यान सचिव खड्काले मंगलबार आयोजित कार्यक्रममा भने, ‘एनपीएलको प्लेयर अफ द सिरिजमा विदेशी वा नेपाली खेलाडी हुन सक्छन् । विदेशी प्लेयर अफ द सिरिज चुनिएमा नेपालको उत्कृष्ट खेलाडीले वा नेपाली प्लेयर अफ द सिरिज भएमा उनै खेलाडीले कार पाउनेछन् ।’
शारडा समूहले एनपीएलका उत्कृष्ट नेपाली खेलाडीलाई बजारमूल्य ६२ लाख रहेको ओमोडा–ई ५ कार दिने घोषणा गरेको छ । एनपीएलको व्यावसायिक अधिकार व्यवस्थापन गरिरहेको ब्रान्ड डिजिटल लजिक प्रालि र क्यानको सहकार्यमा शारडा समूहसँग सम्झौता भएको हो ।
घरेलु क्रिकेट प्रतियोगितामा पहिलो पटक नेपाली खेलाडीले उत्कृष्ट खेलाडी भएवापत कार पाउन लागेका हुन् । क्रिकेटमा खेलेरै बाँच्न सकिन्छ भन्नका लागि यो पुरस्कार ठूलो आधार भएको सचिव खड्काले बताए ।
एसपीजीका निर्देशक गौरव शारडाले एनपीएलसँगको यो सहकार्यले नेपालमा क्रिकेट प्रवर्द्धन र विकासमा टेवा पुग्ने जनाउँदै भने, ‘हामीले लामो एवं रोमाञ्चक यात्रा सुरुआत गरेका छौं ।’ एसपीजी अटोमोबाइल्सका शिवरतन शारडा, धिरेन्द्र तामाङलगायत कार्यक्रममा उपस्थित थिए ।
यसैबीच क्यानले एनपीएलको युट्युब प्रशारण अधिकार डिस मिडिया नेटवर्कलाई दिने भएको छ । ब्रान्ड लजिक र डिस मिडिया नेटवर्कबीच सम्झौता भएको छ । एनपीएल पहिलो संस्करणका खेलको
युट्युब प्रशारण अधिकार एक्सन स्पोर्ट्सले पाएको हो । एक्सन स्पोर्ट्सको आधिकारिक युट्युब च्यानलमार्फत प्रत्यक्ष प्रशारण गर्नेछ । टेलिभिजनमा भने स्टार स्पोर्ट्स नेटवर्कले प्रशारण गर्नेछ ।
