— कन्फेडेरेसन अफ नेसनल स्पोर्ट्स एसोसिएसनको बैठकले समसामयिक खेलकुदका विभिन्न माग राखेर युवा तथा खेलकुदमन्त्री तेजुलाल चौधरीसक्षम ज्ञापनपत्र पेस गर्ने भएको छ ।
कन्फेडेरेसन नेपाल ओलम्पिक कमिटीमा आबद्ध खेलसंघहरू मिलेर बनेको संस्था हो । सातदोबाटोस्थित तेक्वान्दो संघको सभाहलमा टेनिस संघकी अध्यक्ष ज्योति राणाको अध्यक्षतामा बसेको कन्फेडेरेसनको बैठकले उक्त निर्णय गरेको छ ।
राष्ट्रिय खेलकुद विकास ऐन, २०७७ संशोधनका लागि बनेको विधेयकको मस्यौदा यथाशीघ्र माग गर्ने, १० औं राष्ट्रिय खेलकुदको मिति निर्धारण गर्नुपूर्व सम्बन्धित खेल संघका प्रतिनिधिबाट खेलस्थलको अनुगमन, निरीक्षण र सरोकारवाला खेल संघको परामर्शमा १० औं राष्ट्रिय खेलकुदसम्बन्धी निर्देशिका जारी गर्नुपर्नेलगायतका मागसहित ज्ञापनपत्र पेस गरिने भएको छ ।
त्यससम्बन्धी निर्णय नहुञ्जेलसम्म हाल तय गरिएको राष्ट्रिय खेलकुद परिषद्को बोर्ड बैठकसमेत स्थगित गर्न माग गर्ने निर्णयसमेत जनाइएको छ । राखेपको बोर्ड बैठक यसै साता गर्ने तयारी भइरहेको छ । १५ महिनापछि बोर्ड बैठक बस्न लागेको हो ।
यी विषयहरूको सहजीकरणका लागि सम्बन्धित निकायमा नेपाली कांग्रेसका खेलकुद विभाग प्रमुख उमेशजंग रायमाझीले आवश्यक पहल गर्ने बताइएको छ ।
