— रुसले यक्रेनका ऊर्जा संरचनामा भीषण आक्रमण गरेको छ । युक्रेनी राष्ट्रपति भ्लोदिमिर जेलेन्स्कीले रूसी सेनाले बिहीबार युक्रेनका ऊर्जा केन्द्रहरूमा कैयौं राउण्ड हवाई आक्रमण गरेको बताएका छन् ।
रूसी सेनाले क्षेप्यास्त्र तथा ड्रोनमार्फत भीषण आक्रमण गरेको र कैयौं स्थानमा विद्युत् आपूर्तिमा व्यापक समस्या आएको जेलेन्स्कीको भनाइ छ । आक्रमणका कारण चिसो मौसममा १० लाखभन्दा बढी युक्रेनी नागरिक बिजुलीबिना नै बाँच्न बाध्य भएको जेलेन्स्कीले जनाए ।
'धेरै क्षेत्रमा शक्तिशाली विस्फोटक पदार्थ खसालिएको छ । उनीहरूले नागरिक पूर्वाधारलाई निशाना बनाएका छन्,' जेलेन्स्कीले भनेका छन् । युक्रेनी सेनाले ७९ वटा क्षेप्यास्त्र र ३५ वटा ड्रोन खसालेको उनको दाबी छ ।
रुसी राष्ट्रपति भ्लादिमिर पुटिनले भने युक्रेनले अमेरिका र बेलायतमा निर्मित लामो दूरीका क्षेप्यास्त्र प्रहार गरेको प्रतिक्रियामा रुसी सेनाले युक्रेनको पावर ग्रिडमा आक्रमण गरेको बताएका छन् ।
'मैले धेरैपटक भनेको छु । हाम्रा तर्फबाट सधैं जवाफ आउनेछ,' दुई दिने भ्रमणका क्रममा कजाकस्तान पुगेका पुटिनले भने । रुसको नयाँ बलिस्टिक क्षेप्यास्त्रले किभस्थित निर्णय केन्द्रलाई निशाना बनाउने पुटिनले चेतावनीसमेत दिएका छन् ।
'बुधबार राति हामीले व्यापक आक्रमण गर्यौं,' उनले भने, 'युक्रेनी भूभागमा रहेका १७ वटा सैन्य केन्द्रमा आक्रमण गरिएको थियो ।' रुसले पछिल्लो दुई दिनमा युक्रेनमा १ सय क्षेप्यास्त्र र ४ सय ६६ ड्रोन प्रहार गरेको बताए । तीमध्ये ९० क्षेप्यास्त्र र १ सय ड्रोन बुधबार राति प्रहार गरेको बताए ।
पुटिनले गत साता युक्रेनी सहर डिनिप्रोमा प्रहार गरेको ओरेश्निकको क्षेप्यास्त्रले किभका निर्णय गर्ने केन्द्रहरूमा आक्रमण गर्ने चेतावनी दिएको बीबीसीले जनाएको छ । रुसले सबै नाटो देशहरूभन्दा १० गुणा बढी क्षेप्यास्त्र उत्पादन गरेको दाबी गर्दै पुटिनले सन् २०२५ मा लामो दूरीको क्षेप्यास्त्रहरूको उत्पादन २५ देखि ३० प्रतिशतले वृद्धि हुने बताए ।
यसअघि राष्ट्रपति पुटिनले आवश्यक परे रुसले शक्तिशाली नयाँ क्षेप्यास्त्रहरू प्रयोग गर्ने बताएका थिए । युक्रेनले गत साता रुसविरुद्ध अमेरिका र बेलायतमा निर्मित क्षेप्यास्त्र प्रयोग गरेको थियो । त्यसको जवाफमा रुसले युक्रेनको डिनिप्रोमा 'ओरेश्निक' क्षेप्यास्त्र प्रहार गरेको थियो ।
