— ब्राइटन एन्ड होभ अल्बानियनले इंग्लिस प्रिमियर लिगमा शुक्रबार राति साउथह्याम्पटनसँग निराशाजनक १–१ को बराबरी खेलेको छ । तर यो नतिजापछि ब्राइटन अंक तालिकाको दोस्रो स्थानमा भने उक्लेको छ ।
अमेरिक एक्सप्रेस स्टेडियममा भएको खेलमा ब्राइटनले काओरु मिटोमाको गोलले पहिलो हाफमा अग्रता लिएको थियो ।
अंक तालिकाको पुछारमा रहेको साउथह्याम्पटनका लागि फ्लन डावेन्सले दोस्रो हाफमा बराबरी गोल फर्काए । यो नतिजापछि ब्राइटनको १३ खेलबाट २३ अंक भएको छ र यो शीर्षमा रहेको आठ अंकको दूरी हो । साउथह्याम्पटन भने पाँचै अंकसहित सबैभन्दा पुछारमा रहेको छ । शनिबार प्रिमियर लिगमा पाँच खेल हुनेछन् ।
त्यसमा ब्रेन्टफोर्डले लेस्टर सिटी, क्रिस्टल प्यालेसले न्युकासल युनाइटेड, नटिङघम फरेस्टले इपस्विच टाउन, उल्भ्सले बर्नमाउथ, वेस्ट ह्यामले आर्सनलको सामना गर्नेछ । लेस्टरले शुक्रबार मात्रै आफ्ना नयाँ प्रशिक्षकका रूपमा रुड भान निस्टलरोयलाई नियुक्त गरेको छ । लेस्टरले यसअघिका प्रशिक्षक स्टिभ कुपरलाई वर्खास्त गरेको थियो ।
युरोपली फुटबलका शुक्रबार रातिका अन्य खेलमध्ये स्पेनी ला लिगामा रियल मार्लोकाले भ्यालेन्सियालाई २–१, जर्मन बुंडेसलिगामा सेन्ट पउलीले होलेस्टेन केललाई ३–१, इटालीको सिरी ‘ए’ मा कागलिरीले हेलास भेरोनालाई १–० र फ्रान्सेली लिग–वानमा लेन्सले रेमिसलाई २–० ले हरायो ।
