— सिरियाको दोस्रो ठूलो सहर अलेप्पोको धेरैजसो भाग विद्रोहीहरूले नियन्त्रणमा लिएका छन् । बेलायतस्थित निगरानी समूह सिरियन अब्जर्बेटरी फर ह्युमन राइट्सका अनुसार गत बुधबारदेखि सुरू भएको आक्रमणमा कम्तीमा २० सर्वसाधारणसहित ३ सय जनाभन्दा धेरै मारिएका छन् ।
सन् २०१६ मा राष्ट्रपति बसर अल-असदको सेनाबाट पराजित विद्रोहीले गत बुधबार अलेप्पोमा आक्रमण गरेका थिए । यो सिरियाली सरकारविरुद्ध लामो समयपछिको ठूलो आक्रमण भएको बीबीसीले जनाएको छ ।
असदलाई समर्थन गर्दै आएको रुसले पनि सन् २०१६ यता पहिलोपल्ट शुक्रबार रातिदेखि अलेप्पोका विभिन्न स्थानमा आक्रमण गरेको थियो । सन् २०११ मा द्वन्द्व सुरू भएसँगै रुसले राष्ट्रपति असदलाई सहयोग गर्दै आएको छ । सन् २०१५ सेप्टेम्बरदेखि भने रुसी सेना सिरियाको द्वन्द्वमा प्रत्यक्ष रूपमा संलग्न छ ।
समाचार संस्था रोयटर्सका अनुसार अलेप्पो सहरको विमानस्थल र सहरतर्फ जाने सबै सडक बन्द गरिएको छ । विद्रोहीहरूले ठूलो प्रतिरोधबिना नै अलेप्पोको आधा भूभाग कब्जा गरेको निगरानी समूहका निर्देशक रामी अब्देल रहमानलाई उद्धृत गर्दै समाचार संस्था एएफपीले जनाएको छ । 'नगर परिषद, प्रहरी स्टेशन, गुप्तचर कार्यालयहरू सबै खाली छन्,' उनले भने, 'यस्तो पहिले कहिल्यै भएको थिएन ।'
सरकारी सैनिकपछि हटेका कारण त्यहाँ कुनै भिडन्त नभएको र एउटा पनि गोली नचलेको उनले बताए । यसअघि सेनाले बुधबार विद्रोही र तीनका सहयोगीले आक्रमण सुरु गरेका र नियन्त्रणमा लिएका अलेपो र इड्लिब प्रान्तका केही सहरमाथि शुक्रबार पुन: नियन्त्रण कायम गरेको जनाएको थियो ।
इस्लामिक लडाकु समूह ताहिर अल-शाम ‘एचटीएस’ सम्बद्ध च्यानलमा पोस्ट गरिएका भिडियोमा सहरका विभिन्न स्थानमा विद्रोही लडाकुहरू देखिएका बीबीसीले जनाएको छ । उक्त दृश्य अलेप्पोको पश्चिमी क्षेत्रको रहेको बीबीसीले पुष्टि गरेको छ।
सिरियामा सन् २०११ मा लोकतन्त्रपक्षधर विरोध प्रदर्शनहरूमा सरकारले दमन गरेपछि गृहयुद्ध सुरू भएको थियो । युद्धका कारण कम्तीमा पाँच लाख मानिसहरू मारिएका छन् । सशस्त्र समूहहरूले असद सरकारको विरोधमा देशमा चलिरहेको राजनीतिक उथलपुथलको फाइदा उठाउँदै सिरियाका कतिपय स्थान कब्जामा लिएका थिए ।
तर पछि रुस र अन्य देशहरूको सहयोगमा सिरिया सरकारले आफूले गुमाएका अधिकांश क्षेत्र पुन: नियन्त्रणमा लिएको थियो । हाल सिरियाको इडलिब क्षेत्र इस्लामिक विद्रोही समूह हयात ताहिरर अल-शाम (एचटीएस) को नियन्त्रणमा छ । तर उक्त क्षेत्रमा टर्की समर्थित विद्रोही समूह र टर्कीको सरकारी फौजको पनि उपस्थिति छ ।
