— आर्सनलले इंग्लिस प्रिमियर लिगमा शनिबार वेस्ट ह्याममाथि ५–२ को प्रभावशाली जित निकालेको छ र आफूलाई लिग उपाधिको होडमा कायम राखेको छ । खेलका सातै गोल पहिलो हाफमा भएका थिए ।
यो जितपछि आर्सनल अंक तालिकाको दोस्रो स्थानमा पनि उक्लेको छ । उसको १३ खेलबाट २५ अंक भएको छ र यो शीर्षमा रहेको लिभरपुलसँग छ अंकको दूरी हो । वेस्ट ह्याम भने १५ अंकमै सीमित रहेर १४ औं स्थानमा छ ।
शनिबारका अन्य खेलमा ब्रेन्टफोर्डले लेस्टर सिटीलाई ४–१, नटिङघम फरेस्टले इपस्विच टाउनलाई १–० र बर्नमाउथले उल्भ्सलाई ४–२ ले हरायो । यस्तै क्रिस्टल प्यालेस र न्युकासल युनाइटेडले १–१ को बराबरी खेले ।
आइतबार लिग तालिकाको पहिलो स्थानमा रहेको लिभरपुलले डिफेन्डिङ च्याम्पियन म्यानचेस्टर सिटीको सामना गर्दैछ र यसको नतिजाले लिग उपाधि होडलाई निर्धारण गर्न सक्नेछ ।
