— स्पेनी च्याम्पियन रियल म्याड्रिडले गेटाफेलाई २–० ले पराजित गर्दै ला लिगाको दोस्रो स्थानमा उक्लेको छ । खराब लयबाट गुज्रिरहेका केयलिन एमबापे त्यसमा एक गोल गरे ।
खेलमा उनले उत्तिकै राम्रा अवसर पनि सदुपयोग गर्न सकेनन् । पछिल्लो समय उनी खराव प्रदर्शनका कारण आलोचनाको शिकार भइरहेका छन् ।
रियलको यस जितमा अर्को गोल जुड बेलिङघमको नाममा रह्यो । इंग्लिस खेलाडीले पेनाल्टीबाट गोल गरेका हुन् । यो जितपछि रियलले शीर्षमा रहेको बार्सिलोनासँगको दूरी एक अंकमा छोट्याएको छ ।
अघिल्लो दिन मात्रै बार्सिलोना लास पाल्माससँग पराजित भएको थयो । बार्सिलोनाको १५ खेलबाट ३४ अंक भएको छ भने रियलले एक खेल कम खेलेको छ र उसको ३३ अंक भएको छ । अब रियलसामु बार्सिलोनालाई उछिन्ने अवसर हुनेछ ।
खेलपछि प्रशिक्षक कार्लो एन्सेलोटीले एमबापेको प्रशंसा गर्दै भने, ‘आज एमबापेले राम्रो खेले । पूरा खेलमा सक्रिय रहे । आजको खेलमा उनको दोस्रो गोल नतिजाको लागि निकै निर्णायक रह्यो । हामीले उनीबाट चाहेको भने यस्तै खेल हो ।’
आइतबारका अन्य खेलमा एथलेटिको बिलबाओले रायो भालेकानोलाई २–१ र रियल सोसिडाडले रियल बेटिसलाई २–० ले हरायो । भिल्लारियल र जिरोनाले भने २–२ को बराबरी खेले । बिलबाओ २६ अंकमा चौथो स्थानमा रहेको छ ।
