: पाकिस्तानका अनुभवी खेलाडी सोहेल तनभिरले नेपाल प्रिमियर लिग (एनपीएल) को आफ्नो पहिलो खेलमै पाँच विकेट लिएका छन्। काठमाडौं गोर्खाजविरुद्ध सुरुवाती बलिङमा चितवन राइनोजबाट उत्रिएका उनले पहिलो खेलमै पाँच विकेट लिएका हुन्। चार ओभर बलिङ गरेका उनले २१ रन खर्चिएर पाँच विकेट लिएका हुन्।
आफ्नो बलिङ शैलीले उनी संसारभर चर्चामा रहँदै आएका तनभिरले स्टेफन स्किनाजी, माइकल लेभिट, भीम सार्की, करण केसी र साहब आलमलाई पेभेलियन फर्काएका थिए। उनको घातक बलिङमा टस हारेर पहिले ब्याटिङ गरेको काठमाडौं गोर्खाज निर्धारित २० ओभरमा नौ विकेट गुमाउँदै एक सय ११ रनमा समेटिएको थियो।
लामो समय पाकिस्तानी टोलीमा बिताएका बायाँ हाते तीब्र गतिका बलर तनभिरले राजस्थान रोयल्सबाट इन्डियन प्रिमियर लिग (आईपीएल) खेलका थिए। उनले टोलीलाई उपाधि दिलाउन महत्वपूर्ण भूमिका निर्वाह पनि गरेका थिए। उनी आईपीएलसँगै पाकिस्तान सुपर लिग विजेता टोलीको पनि सदस्य हुन् । उनको सबैभन्दा ठूलो उपलब्धि पाकिस्तानलाई सन् २००९ मा टीट्वेन्टी विश्वकपको उपाधि दिलाउनु हो।
‘मैले नेपाल यात्रालाई एक चुनौतीका रुपमा लिएको छु। नेपाल आएर हजारौं नेपाली क्रिकेट फ्यानहरूका सामु चितवन राइनोजको प्रतिनिधित्व गर्न पाउँदा अत्यन्त गौरवशाली अनुभूति गरेको छु। मलाई लाग्छ नेपालमा पनि पाकिस्तानी क्रिकेट टिमका धेरै फ्यानहरू छन्’, तनभिरले नेपाल आउनु अघि भनेका थिए।
चितवन राइनोजले दक्षिण अफ्रिकाका मचेन्ट डे ल्याङको स्थानमा तनभिरलाई टोलीमा अनुबन्ध गरेको हो। ‘हामीलाई यस्तै कुनै खेलाडीको खाँचो थियो। हामीले डे लाङको अभावलाई खड्किन नदिन सोहेल तनभिरलाई अनुबन्ध गरी टिममा नयाँ ऊर्जा थपेका हौं। उनको उपस्थितिले टिमलाई उत्कृष्ट प्रदर्शन गर्न प्रोत्साहित गर्दछ’, चितवन राइनोजका अध्यक्ष आयुष न्यौपानेले भनेका थिए।
चितवनले यसअघि इङ्ल्यान्डका लुक मार्टिन बेनकेन्स्टाइन, अफगानिस्तानका हसन इसाखिल, नामिबियाका जान निकोल लोफ्टी इटन र इङ्ल्यान्ड रवि बोपारालाई भित्र्याएको छ। चितवनको मार्की खेलाडीमा राष्ट्रिय टोलीका अलराउन्डर कुशल मल्ल छन्। टोलीले राष्ट्रिय टोलीका पूर्व प्रशिक्षक उमेश पटवाललाई प्रशिक्षकको जिम्मेवारी सुम्पिएको छ।
