— एटलान्टाले इटालीको सिरी ए मा एएस रोमालाई २–० ले पराजित गरेको छ र यससँग अंक तालिकाको दोस्रो स्थानमा उक्लेको छ । यो जितपछि राम्रो लयमा रहेको एटलान्टाको १४ खेलबाट ३१ अंक भएको छ । यो शीर्षमा रहेको नेपोलीसँग एकै अंकको दूरी मात्र हो ।
नेपोलीको ३२ अंक छ । रोमा भने खराब लयबाट गुज्रिरहेको छ र १३ अंकमा १५ औं स्थानमा छ । यो रेलिगेसनबाट दुई अंकको दूरी मात्रै हो । यस खेलसँगै क्लबको प्रशिक्षक क्लाउडियो रेनेरी फर्केका छन् । तर उनको नेतृत्वको पहिलो खेलमै रोमा घरमै पराजित रह्यो ।
मार्टिन डे रुनले ६९ औं मिनेटमा गरेको गोलको मद्दतले एटलान्टाले अग्रता लिएको थियो भने निकोला जानिओलोले ८९ औं मिनेटमा दोस्रो गोल थपे । सबै खाले प्रतियोगितामा गरेर एटलान्टाको यो लगातार आठौं जित हो ।
गत सिजन युरोपा लिग जितेर ऐतिहासिक प्रदर्शन गरेको एटलान्टाले अहिलेसम्म लिग उपाधि भने जित्न सकेको छैन् । खेलपछि गोलकर्ता रुनले भने, ‘आजको खेल सजिलो रहेन् । खासमा गाह्रो नै रह्यो । तर जितसँगै तीन अंक बहुमूल्य रह्यो ।’
यसैबीच स्पेनको ला लिगामा सेभिया र ओसासुनाले १–१ को बराबरी खेलेका छन् । ओसासुनाले एनटे बुडिमिरको गोलले ६९ औं मिनेटमा अग्रता लिएयता डोडि लुकेबाकिओले ७२ औं मिनेटमै बराबरी गोल फर्काए ।
