। नेपाली कांग्रेसका नेता डा.शेखर कोइरालाले पालिका सभापतिहरुको संरक्षण आफूले गर्ने प्रतिबद्धता व्यक्त गरेका छन् ।
कोइराला पक्षले विराटनगरमा पालिका सभापतिहरूको सम्मेलन राखेपछि आधिकारिक कार्यक्रम नभएको पत्राचार गरेको थियो । २२ मंसिरमा कोशीको प्रदेश सम्मेलन अघि पार्टीको औपचारिक कार्यक्रम नभएको पत्र कोशीका पालिका सभापतिलाई केन्द्रले हिजो सूचना जारी गरेको थियो । संस्थापनइतरले राखेको कार्यक्रममा पार्टीमा विवाद उत्पन्न भएको थियो ।
पार्टीले औपचारिक रुपमा जानकारी गराएपछि शेखर पक्षले बोलाएको भेलामा उपस्थित हुने नहुनेमा पालिका सभापतिहरू अन्योलमा परेका थिए । कोशीका १३७ पालिकाबाट ११३ पालिका सभापति भेलामा सहभागी भएको शेखर पक्षले जनाएको छ ।
आफ्नो पक्षको भेलामा आएका पालिका अध्यक्षहरुलाई भय नराख्न आग्रह गर्दै संरक्षण गर्ने प्रतिबद्धता व्यक्त गरे । भेलामा शेखरले भने,‘कुनै किसिमको डर, धाक, धम्कीबाट उहाँहरु आत्तिनुभएन । तपाईंहरू निस्फिक्रि भएर घर जानुस् । तपाईंहरूको संरक्षण म गर्छु ।’ आज लागि तय भएको कार्यक्रम धेरै पहिले नै टुंगो लगाएकाले विवाद गर्नुपर्ने विषय नरहेको बताए । विराटनगर र सुनसरी बाहेकका पालिका सभापतिलाई अलि टाढा रहेकाले प्रशिक्षणको उद्देश्यले भेला डाकिएको उनले सुनाए ।
पालिका र महानगरका सभापतिका लागि विधान अधिकार खुम्चिएको र उनीहरूको माग सम्बोधन गर्न तयार रहेको कोइरालाले बताए । महानगरपालिका सभापतिहरूलाई माग आफूलाई ज्ञान भएको कोइरालाले बताए । ‘उहाँहरूले मागेको भन्दा पनि केही कुुरा दिन सकिन्छ भने दिऔं भनेको छु । उहाँहरूलाई दिन्छौं/गर्छौं भन्ने कुरा विश्वास दिलाउन चाहन्छु ।’
संविधान संशोधन गर्ने गरी गठन भएको सरकारले त्यसतर्फ पहलकदमी नलिएको शेखरले चर्चा गरे । सरकार बनेको चार महिना लाग्दा समेत सत्ता पक्ष र अन्य दलसँग पनि छलफल हुन नसकेको बताए ।
‘त्यसको लागि कल्लो के रोकेको छ? र, किन भइराखेको छैन,’ शेखरले भने । १५ औं महाधिवेशनबाट गलत कुरा हुन नदिने र कार्यकर्ताको संरक्षण आफूले गर्ने जिम्मेवारी लिने बताए ।
नेता शेखरले २०८३ को मंसिरसम्म १५ औं महाधिवेशन हुने सम्भावना नदेखेको बताए । अधिवेशनमा समयमा हुनुपर्छ भनी गाउँ गाउँमा भन्नु जरुरी र दबाब सिर्जना गर्नुपर्ने अवस्था रहेको बताए । ‘क्रियाशील सदस्यताको अहिले जुन भइरहेको छ । यो तरिकाले अधिवेशन समय हुने सम्भावना छैन,’ उनले भने ।
