— अस्ट्रेलियाले देशमा आवश्यक जनशक्तिको आधारमा आगामी वर्षका लागि दक्ष व्यवसायको नयाँ सूची सार्वजनिक गरेको छ । सार्वजनिक सूचीमा कुक, एकाउन्टेन्ट, सेफलगायतका धेरै दक्ष कामदारलाई सूचीमा अटाइएको छ ।
अस्ट्रेलियाले आफूलाई चाहिएको जनशक्तिका आधारमा हरेक वर्ष यो सूची सार्वजनिक गर्ने गरेको छ । सूचीमा रहेका व्यवसायमा दक्ष र अस्ट्रेलियाका अध्यागमन नियम तथा कानुनअनुसार योग्यता पुगेका व्यक्तिले अनसोर (स्वदेश) तथा अफसोर (विदेश) बाटैसमेत आवेदन दिन पाउने प्रावधान छ ।
सरकारले मंगलबार सार्वजनिक गरेको यस सूचीमा ४ सय ५६ कामलाई समावेश गरेको छ । सार्वजनिक नयाँ सूचीले अस्ट्रेलियाको रोजगार क्षेत्रमा देखिएको कामदार अभावलाई धेरै हदसम्म परिपूर्ति गर्ने जनाइएको छ । नयाँ सूचीमा आबद्ध कामदार सूचीले अस्ट्रेलियाको अर्थतन्त्रमा महत्त्वपूर्ण योगदान पुर्याउने उल्लेख गरिएको छ ।
सार्वजनिक सूचीमा निर्माण, स्वास्थ्य तथा शिक्षा, इन्जिनियरका साथै सिकर्मीसमेतलाई समेटिएको छ । यस सूचीमा नेपालीले अध्ययन तथा दक्षता राख्ने विषयहरू नर्सिङ, इन्जिनियरिङ, कुक, सेफ, बेकरी, एकाउन्टिङलगायतका विभिन्न पेशालाई पनि समेटिएको छ । सूचीमा बाख्रापालक, सुँगुर पालक, फूल फूलाउने माली, कुखुरा कृषक, भिडियो निर्माता, टेलिभिजन, रेडियो तथा छापा पत्रकार, वेब डिजाइनर, शिक्षक, फामार्सिस्ट डेन्टिस्ट, चिकित्सकलगायतलाई समेटिएको छ । यस क्षेत्रका जानकारका अनुसार सरकारको अध्यागमन कानुनअनुसार योग्यता पुगेको खण्डमा नेपालबाटै समेत आवेदन दिन सकिन्छ ।
यो सूची यहाँको सरकारी निकायले कामदारका क्षेत्रमा काम गरिरहेका विज्ञसँगको छलफलपछि सार्वजनिक गर्ने गरेको छ । अस्ट्रेलियाका अध्यागमन मन्त्री टोनी बर्कले सरकार अहिले देखिएको दक्ष कामदार अभावलाई परिपूर्ति गर्न लागिपरेको बताएका छन् । बिजनेस काउन्सिल अफ अस्ट्रेलियाले सरकारले सार्वजनिक गरेको नयाँ सूचीले यहाँ देखिएको कामदार अभावलाई पूर्ति गर्न सहयोग गर्ने बताएको छ । अस्ट्रेलियास्थित कानुन व्यवसायी सञ्जीव पाण्डेले यो सूची हरेक वर्ष सार्वजनिक गर्ने गरेको र यस वर्षको सूचीमा पनि गत वर्षको तुलनामा खासै परिवर्तन नभएको बताए ।
यसैबीच अस्ट्रेलियाले मोबिलिटी अरेन्जमेन्ट फर ट्यालेन्टेड अर्ली प्रोफेसनल स्किम (मेट्स) कार्यक्रमअन्तर्गत भारतबाट वार्षिक ३ हजार कामदार भित्र्याउने भएको छ । अध्यागनमन विभागका अनुसार यस कार्यक्रमअन्तर्गत निश्चित क्षेत्रमा दक्ष भारतीय कामदारले अवसर पाउनेछन् ।
४०३भिसा सबक्लासअन्तर्गत दिइने यस भिसामा आउने कामदारले २ वर्षसम्म अस्ट्रेलियामा सम्बन्धित क्षेत्रमा काम गर्न पाउनेछन् । यस कार्यक्रम आउने योग्य भारतीय कामदारले दर्ता गरिसकेपछि यहाँस्थित सरकारले आधिकारिक रूपमा निमन्त्रणा गरेपछि मात्र भिसाको आवेदन दिन पाउनेछन् । यस कार्यक्रमअन्तर्गत नवीकरणीय ऊर्जा, माइनिङ, सूचना तथा सञ्चार, आर्टिफिसियल टेक्नोलोजी, इन्जिनियरिङलगायतका विषय समेटिएका छन् ।
