। कप्तान रोहित पौडेलले ब्याट र बलमा उत्कृष्ट प्रदर्शन गरेपछि लुम्बिनी लायन्सले नेपाल प्रिमियर लिग (एनपीएल) मा पहिलो जित हात पारेको छ ।
रोहितले ब्याटिङ र बलिङ दुवैमा ‘कप्तान लिड फ्रम दी फ्रन्ट’ भनेजस्तै सानदार अलारउण्ड प्रदर्शन गरेपछि लुम्बिनीले चितवन राइनोजलाई ३३ रनले हराउँदै पहिलो जितको स्वाद चाखेको हो । रोहितले ब्याटिङमा ८० रन बनाए भने बलिङमा ४ विकेट लिए ।
पहिलो जितपछि लुम्बिनीले पाँचौ खेलमा अंक खाता खोलेको छ । ५ खेलबाट लुम्बिनीले २ अंक जोडेको छ ।
रोहितकै ४ विकेट प्रदर्शनमा १६८ रनको लक्ष्य पछ्याएको चितवन राइनोजले पूरै २० ओभर खेल्दा पनि ८ विकेट गुमाएर १३४ रन मात्र बनाउन सक्यो ।
चितवनका लागि लुक बेन्केनसटाइनले सर्वाधिक ३१ रन बनाउनबाहेक अन्य ब्याटरले राम्रो प्रदर्शन गर्न सकेनन् । कप्तान कुशल मल्ल २०, रवि बोपारा १२ र सन्तोष कार्की १० रन बनाएर आउट भए ।
दशौँ नम्बरमा ब्याटिङ गरेका नरबहादुर शार्कीले १२ बल खेल्दै अविजित २२ रन बनाए । उनले एक चौका र एक छक्का प्रहार गरे । रिजन ढकालले १४ बलमा अविजित १५ रन बनाए ।
रामोन सिमोण्ड्ससँगै नयाँ बलमा बलिङ गरेका रोहितले ४ ओभरमा १७ रन मात्र खर्चेर ४ विकेट लिएका हुन् । मुख्य बलरहरुले विकेट लिन संघर्ष गरिरहँदा रोहितले पार्ट टाइम स्पीन बलिङबाट विपक्षीको विकेट झारेका हुन् ।
बलिङमा उनले रामोन सिमोण्ड्ससँग नयाँ बल बलिङ गरेका थिए । दोस्रो ओभरमै बलिङ गरेका रोहितले सुरुमै विपिन राउललाई आउट गरे । त्यसपछि चौथो ओभरमा सोहेल तनविरलाई कट एण्ड बोल्ड गरेका रोहितले १२औं ओभरमा रवि बोपारा र १४औं ओभरमा जान निकोल लफ्टी इटनलाई आउट गरे ।
लुम्बिनीका रामोन सिमोण्ड्सले ३ ओभरमा १५ रन खरेचेर २ विकेट लिए । साद विन जफर र अभिशेष गौतमले १-१ विकेट लिए ।
त्यसअघि कीर्तिपुरस्थित टीयू अन्तर्राष्ट्रिय क्रिकेट मैदानमा टस हारेर पहिले ब्याटिङ गरेको लुम्बिनीले कप्तान रोहित पौडेल र साद विन जफरको अर्धशत मदतमा ६ विकेट गुमाएर १६७ रन बनाएको थियो ।
दुई ओभरभित्रै २ विकेट गुमाएको र ३८-३ को अवस्थामा रहेको लुम्बिनीका लागि रोहित र साद विन जफरले शतकिय साझेदारी गर्दै इनिङ्स उकासेका थिए । रोहितले ब्याटिङमा दुई विकेट गएपछि दोस्रो ओभरमै क्रिजमा आएर इनिङ्स सम्हालेका थिए ।
रोहितले अन्तिम ओभरमा आउट हुनुअघि ५७ बल खेल्दै ८० रन बनाए । उनले ६ चौका र ५ छक्का प्रहार गरे । रोहितले एनपीएलमा बनाएको यो दोस्रो अर्धशतक हो ।
यसअघि उनले पोखरा एभेन्जर्स विरुद्ध ९५ रन बनाएका थिए । यस्तै विन जफरले ३५ बल खेल्दै ४ चौका र १ छक्का मदतमा ५२ रन बनाए ।
रोहित र विन जफरले पाँचौ विकेटका लागि ११४ रनको साझेदारी गरेका थिए । एनपीएलमा पाँचौ विकेटका लागि भएको यो पहिलो शतकिय साझेदारी हो भने समग्रमा पाँचौ शतकिय साजेदारी हो ।
लुम्बिनीका लागि अर्जुन साउदले १५ र टम मुर्सले १० रन जोडे ।
बलिङमा चितवनका रिजन ढकाले ४ ओभरमा २९ रन खर्चेर ३ विकेट लिए । कप्तान कुशल मल्ल र रन्जित कुमारले समान एक/एक विकेट लिए ।
पहिलो जितपछि लुम्बिनीका कप्तान रोहित पौडेलले साद विन जफरसँग साझेदारी राम्रो भएको र बलिङ पनि राम्रो भएकोले जित हात पारेको बताए । ‘हामीले यो विकेटमा १४० सम्मको रन ट्रिकी हुन सक्छ भन्ने सोचिरहेका थियौं । बीचमा मेरो र जफरको बिचमा भएको साझेदारीले राम्रो स्कोर बनायौं । बलिङमा राम्रो गर्न सक्यौं’ उनले भने ।
रोहितले अझै दुई खेल बाँकी रहेकोले प्लेअफ सम्भावना बाँकी रहेको बताए । ‘अझै पनि २ खेल बाँकी छ र त्यो जित्न सक्यौं भने प्लेअफ सम्भावना अझै बाँकी छ ।’ उनले अरु टिमको नतिजामा पनि भर पर्नुपर्ने बताए ।
लुम्बिनीले अब काठमान्डु गुर्खाज र कर्णाली याक्ससँग खेल्न बाँकी छ । बुधबार काठमान्डुसँग खेलेपछि लुम्बिनीले लिगको अन्तिम खेल शनिवार कर्णालीसँग खेल्नेछ ।
चितवनका प्रशिक्षक उमेश पटवालले केही रन बढि बनेको र लुम्बिनीले पनि राम्रो खेलेको बताए ।’हामीले १५० सम्मको स्कोर ठीक हुन्छ जस्तो सोचेका थियौं । अलिकति रन बढी गयो । लुम्बिनीका बलरहरूले पनि राम्रो बलिङ गरे । रोहितले राम्रो खेलिरहेका छन् ।’ पटवालले भने ।
