— युरोपेली च्याम्पियन्स लिगमा इंग्लिस च्याम्पियन म्यानचेस्टर सिटी युभेन्ट्सको हातबाट २–० ले पराजित भएको छ । यो नतिजाले सिटीको समस्या अझ बढेको छ । अब सिटीमाथि अन्तिम १६ पुग्न नसक्ने डर उत्पन्न भएको छ ।
टुरिनमा भएको खेलमा युभेन्ट्सको जितका लागि डुसान भ्लाहोभिच र वेस्टन म्याककेनीको गोल पर्याप्त रह्यो । यो नतिजापछि सिटी युरोपेली क्लब फुटबलको सबैभन्दा ठूलो प्रतियोगिताको अंक तालिकामा २२ औं स्थानमा रह्यो । उसको छ खेलबाट आठ अंक मात्रै छ ।
अब सिटीले बाँकी खेलमा पेरिस सेन्ट जर्मेन (पीएसजी) र क्लब ब्रुगको सामना गर्नेछ । ‘युभेन्ट्स यो खेलमा जितका लागि हकदार रह्यो, किनभने हामीले राम्रो खेल्न सकेनौं । अब बाँकी खेलमा जितकै लागि खेल्नु पर्नेछ,’ सिटीका प्रशिक्षक पेप ग्वार्डिओलाले भनेका छन् ।
ग्वार्डिओलाको पूर्व क्लब बार्सिलोनाले भने बोरुसिया डर्टमुन्डलाई ३–२ ले हराएको छ र अंक तालिकाको दोस्रो स्थानमा उक्लेको छ । बार्सिलोनाको अब छ खेलबाट १५ अंक भएको छ र यो शीर्षमा रहेको लिभरपुलसँग तीन अंकको दूरी हो ।
बार्सिलोनाका लागि फेरान टोरेसले ८५ औं मिनेटमा निर्णायक गोल गरे । आर्सनल पनि मोनाकोमाथि को ३–० को जितसँग १३ अंकमा तेस्रो स्थानमा उक्लिन सफल भएको छ । त्यसमा बुकायो साकाले दुई गोल गरे ।
अन्य खेलमा एटलेटिको म्याड्रिडले स्लोभान ब्राटिस्लाभलाई ३–१, लिलले स्ट्रम ग्राजलाई ३–२, एसी मिलानले एफके क्राभेनालाई २–१, फायनउडले स्पार्टक प्रागलाई ४–२ र स्टुटगार्टले योङ ब्वाइजलाई ५–१ ले हरायो । यस्तै बेनफिका र बोलोग्नाले गोलरहित बराबरी खेले ।
