— दक्षिण कोरियाली प्रहरीले राष्ट्रपति युन सुक येओलको कार्यालयमा छापा मारेको छ । राष्ट्रपति येओलले सैनिक शासन घोषणा गरेको विषयमा अनुसन्धान गरिरहेको प्रहरीले बुधबार राष्ट्रपति कार्यालयमा छापा मारेको छ ।
राष्ट्रपति युनले गत साता अप्रत्याशित रूपमा संकटकालीन ‘मार्सल ल’ लागू गरेपछि उनीमाथि छानबिन भइरहेको छ । सैन्य शासन लागू भएपछि सेना र हेलिकप्टरहरू संसद्मा पठाइ सांसदहरूलाई युनको सैन्य कानून घोषणालाई मतदान गर्नबाट रोक्नका लागि प्रयास गरिएको थियो ।
युनले घोषणा गरेको सैनिक शासन केही घण्टामा नै त्यहाँको संसद्ले उल्ट्याइदिएको थियो । त्यसपछि युनले आफ्नो कदम फिर्ता लिएका थिए । त्यसलगत्तै युनविरुद्ध विपक्षी दलका सांसदहरूले संसद्मा महाभियोग प्रस्ताव पेश गरेका थिए ।
तर राष्ट्रपति येओलको दल पिपुल्स पावर पार्टी (पीपीपी) का सांसदहरूले गत आइतबार भएको महाअभियोगमाथिको मतदान बहिस्कार गरेका थिए । जसका कारण उनी महाभियोगबाट भने जोगिन सफल भएका थिए ।
दक्षिण कोरियाको प्रहरीको विशेष अनुसन्धान एकाइले बुधबार राष्ट्रपति कार्यालय, राष्ट्रिय प्रहरी निकाय, सियोल महानगर प्रहरी कार्यालय र राष्ट्रिय सभा सुरक्षा सेवामा छापा मारेको जनाएको छ ।
यसैबीच, हिरासतमा रहेका पूर्वरक्षामन्त्री किम योङ ह्युनले मंलबार मध्यरातमा आत्महत्याको प्रयास गरेको दक्षिण कोरियाली सञ्चारमाध्यमले जनाएका छन् । किमले राष्ट्रपति येओललाई सैनिक शासन लागू गर्न सल्लाह र सहयोग गरेको आरोप छ ।
अधिकारीहरूले ‘सैनिक कानून घोषणा गर्न महत्वपूर्ण भूमिकामा संलग्न भएको र नागरिक अधिकारको प्रयोगमा बाधा पुर्याउन पदीय मर्यादाको दुरुपयोग गरेको’ आरोपमा गत आइतबार पक्राउ गरिएको हो । पक्राउ पर्नुभन्दा केही समयअघि नै उनले आत्महत्या प्रयास गरेको न्याय मन्त्रालय र जेलका एक अधिकारीले बताएका छन् ।
