— अल्लु अर्जुन अभिनित फिल्म 'पुष्पा २: द रुल' ले बक्स अफिसमा इतिहास रचेको छ । फिल्म एक सातामै विश्वभरबाट एक हजार ६२ करोड कमाएको हो । फिल्मले भारतीय सिनेमाको इतिहासमा सबैभन्दा छिटो एक हजार करोड कमाउने रेकर्ड तोडेको छ ।
'पुष्पा २: द रुल'ले केवल ६ दिनमै रेकर्ड तोडेको हो । यसअघि 'बाहुबली २ : द कनक्लुजन' ले १० दिनमा यो रेकर्ड बनाएको थियो । फिल्मले प्रदर्शनको पहिलो दिनमै विश्वभर २ सय ९४ करोड भारतीय रुपैयाँको व्यापार गरेको थियो । यो भारतको फिल्म इतिहासमै सबैभन्दा ठूलो ओपनिङ कलेक्सन हो ।
सुकुमारद्वारा निर्देशित पुष्पा '२ : द रूल' सन् २०२१ को हिट फिल्म 'पुष्पाज द राइज'को सिक्वेल हो । यसमा अल्लु अर्जुनसँगै रश्मिका मन्दना र फहद फासिलको मुख्य भूमिका छ । फिल्मले सकारात्मक समीक्षा र राम्रो प्रचारका साथ हलमा दबदबा कायम राखेको छ ।
पछिल्लो विवरणसँगै 'पुष्पा २: द रुल' भारतका सबैभन्दा धेरै कमाइ गर्ने शीर्ष तीन फिल्महरूको सूचीमा प्रवेश गर्ने पनि देखिएको छ । यसअघि 'दंगल'ले २ हजार २६ करोड र 'बाहुबली २ : द कन्क्लुजन' ले एक हजार ८८ करोड भारतीय रुपैयाँ कमाएका थिए ।
