— खेलको अन्त्यतिर गरेको दुई गोलको मद्धतले म्यानचेस्टर युनाइटेडले इंग्लिस प्रिमियर लिगमा म्यानचेस्टर सिटीलाई आइतबार २–१ ले पराजित गरेको छ । एक गोलले पछाडि रहेको युनाइटेडका लागि ब्रुनो फर्नान्डेजले ८८ औं मिनेटमा पेनाल्टीबाट बराबरी गोल गरे ।
इतिहाडमा भएको खेलमा त्यसपछि एमाड डिएगोलले ९० औं मिनेटमा दोस्रो गोल थपे । त्यस अगाडि सिटीका लागि जस्को ग्भारडिलोले पहिलो हाफमा गोल गरेका थिए । यससँगै सिटीका व्यवस्थापक पेप ग्वार्डिओलामाथि चर्को दबाब सिर्जना भएको छ ।
खेलपछि उनले प्रतिक्रिया दिंदै भनेका छन्, ‘सायद म राम्रो फुटबल प्रशिक्षक होइन होला । म नै सिटीको प्रशिक्षक हुं, त्यसैले मैले यो खराव प्रदर्शनको शृंखला तोड्नु नै पर्छ । यो नै एक मात्र सत्य हो ।’
आइतबारको अर्को खेलमा चेल्सीले ब्रेन्टफोर्डलाई २–१ ले हरायो र लिग तालिकाको शीर्ष स्थानमा रहेको लिभरपुलसँगको दूरी दुई अंकमा छोट्यायो । लिभरपुलको १५ खेलबाट ३६ अंक छ भने चेल्सीको १६ खेलबाट ३४ अंक भएको छ ।
अर्को खेलमा टोटनहमले साउथह्याम्पटनलाई ५–० ले हरायो । यस हारसँगै साउथह्याम्पटनले आफ्ना प्रशिक्षक रुसेल मार्टिनलाई वर्खास्त गरेको छ । साउथह्याम्पटन पाँच अंकमा सबैभन्दा पुछारमा छ । आइतबारकै अर्को खेलमा क्रिस्टल प्यालेसले ब्राइटनलाई ३–१ ले हरायो ।
