— भिडियो सेयरिङ प्लाटफर्म टिकटकले १३ देखि १८ वर्षका प्रयोगकर्ताका लागि ब्युटी फिल्टर र बडी फिल्टरमा प्रतिबन्ध लगाउने भएको छ । बालबालिका र किशोरकिशोरीको मानसिक स्वास्थ्यलाई ध्यानमा राखेर यस्तो नीति अवलम्बन गर्न लागेको टिकटकको प्यारेन्ट कम्पनी, बाइटडान्सका ग्लोबल कम्युनिकेन्स प्रतिनिधि इमाद जफरले बताएका छन् ।
शनिबार साँझ टिकटकले आयोजना गरेको ‘टिकटक सेफ्टी एम्बासडर कार्यक्रम’ का लागि काठमाडौंमा उपस्थित जफरले ब्युटी र बडी फिल्टरका विषयमा कम्पनीले विश्वव्यापी रूपमा नयाँ नीति लागू गर्न लागेको जानकारी दिएका हुन् । उनले १३ देखि १८ वर्षका किशोरकिशोरीहरू यस्ता फिल्टरको प्रयोगबाट कस्तो असर पर्न सक्छ भन्ने निर्णय लिने गरी परिपक्व नहुने कम्पनीको धारणा रहेको बताए । ‘यस्तो नीति हामी विश्वव्यापी रूपमै लागू गर्दै छौं,’ उनले भने, ‘टिनएजका केटाकेटीहरू यस्ता फिल्टरको मानसिक असरबारे सचेत नहुने भएकाले हाम्रो एपमा उनीहरूलाई यो सुविधा प्रयोगमा रोक लगाउने हाम्रो तयारी छ ।’
आउँदा दिनमा सो उमेरका केटाकेटीले आफ्ना भिडियोमा आँखा ठूला बनाउने, ओठको मोटाइ बढाउने, छाला चिल्लो देखाउने, छालाको रङ बदल्नेजस्ता ब्युटी फिल्टर प्रयोग गर्न पाउने छैनन् । एपभित्रको ‘बोल्ड ग्ल्यामर’ जस्तो अनुहारको विशेषता नै फेरबदल गरिदिनसक्ने चर्चित फिचर यो समूहका लागि उपलब्ध हुने छैन ।
तथापि, अनुहारमा जनावरका कान वा कुकुरको नाक जोड्न मिल्नेजस्ता रमाइला फिल्टरहरू भने उपलब्ध हुने बाइटडान्सले उल्लेख गरेको छ । ‘टिकटक समुदायलाई सुरक्षित राख्नु हाम्रो उच्चतम प्राथमिकताभित्र पर्छ,’ जफरले भने, ‘मानसिक स्वास्थ्यको विषयमा सचेतना फैलाउने कुरा त झनै हाम्रो विशेष सरोकारको क्षेत्र हो । यसका लागि हामीसँग छुट्टै आन्तरिक स्रोत पनि छ ।’
डिजिटल सुरक्षा र सचेतनाका विषयमा टिकटकले आगामी दिनमा नेपाल र दक्षिण एसियामा विभिन्न कार्यक्रमहरू आयोजना गर्ने जफरले जानकारी दिए । ‘टिकटक सेफ्टी एम्बासडर कार्यक्रम’ मा डिजिटल साक्षरता, अनलाइन सुरक्षा र स्वस्थ्य डिजिटल वातावरण निर्माणका विषयमा कन्टेन्ट क्रिएटरहरूमाझ छलफल गरिएको थियो ।
