— जनता समाजवादी पार्टी, नेपालका अध्यक्ष एवं पूर्वउपप्रधानमन्त्री उपेन्द्र यादवले नेपालमा दलाल पुँजीवाद संस्थागत भएको बताएका छन् । सिरहाको गोलबजारमा सोमबार आयोजित अभिमुखीकरण कार्यक्रमलाई सम्बोधन गर्दै यादवले यस्तो बताएका हुन् ।
‘नेपालमा नयाँ किसिमको अर्थव्यवस्था देखिएको छ, त्यो हो दलाल पुँजीवाद,’ उनले भने, ‘यो व्यवस्थामा दलाल बिचौलियाहरू दलाली गरेर बिनालगानी करोडौं अर्बौं कमाइरहेका छन् ।’ मुलुकमा दलाल, बिचौलिया र नोकरशाहहरू मन्त्रीदेखि प्रधानमन्त्रीसम्म नियुक्त गर्ने हैसियतमा पुगेको यादवले बताए ।
मुलुकको सधैंभरि बागडोर सम्हालेको कांग्रेस, कम्युनिस्ट र नोकरशाहहरूले दलाल पुँजीवादलाई संरक्षण गर्दै यसको संस्थागत गरेको यादवको भनाइ छ । उनीहरुले कमिसनतन्त्र र लुटतन्त्र संस्थागत गर्दै लोकतन्त्र बर्बादलाई बर्बाद पारेको उनले आरोप लगाए ।
नेपालमा कांग्रेस र कम्युनिस्ट असफल र निकम्मा सिद्ध भएको भन्दै उनीहरुबाट अझै पनि आशा गर्नु मुर्खताबाहेक केही पनि नहुने यादवले बताए । उनले कांग्रेस, एमाले, माओवादी, राप्रप्राहरू नामका लागि फरक-फरक भनिए पनि सिद्धान्त भने सत्तामा गएर लुट्नु नै रहेको यादवले बताए । यी दलहरूले मुलुकको शिक्षा, स्वास्थ्य, कृषि, उद्योग सबै क्षेत्रलाई ध्वस्त पारेको यादवले आरोप लगाए । मुलुक अहिले २४ खर्ब ऋणमा डुबेको र यो सबै रकम उनीहरुले भ्रष्टाचार गरेको यादवको आरोप छ ।
यस्तै, जसपा नेपालका उपाध्यक्ष एवं पूर्वमन्त्री राजकिशोर यादवले अहिले राष्ट्रिय राजनीति निराशाको दौडबाट गुज्रिरहेको बताए । मुलुक आर्थिक रूपबाट जर्जर, सामाजिक रूपमा विभाजित र समाजमा व्यक्ति केन्द्रित प्रवृत्ति मौलाएको भन्दै चिन्ता व्यक्त गरे । मुलुकमा रूपान्तरणका लागि शासनसत्तामा रहँदै आएको एउटै समुदायको बर्चस्व र अधिपत्य तोड्नुपर्ने यादवको भनाइ छ ।
