— नेपाल आयल निगम र इन्डियन आयल कर्पोरेसन (आईओसी) को ‘स्टेरिङ कमिटी’ बैठकले दुई पेट्रोलियम पाइप लाइन परियोजना ५४ महिनाभित्रै सक्ने सहमति गरेको छ । सिलिगुडी–चारआली र अमलेखगन्ज–लोथर पेट्रोलियम पाइप लाइन उक्त अवधिभित्र सक्ने गरी काम थाल्ने सहमति भएको हो ।
मंगलबार काठमाडौंमा सुरु भएको बैठकले प्राविधिक तथ्यांक एकआपसमा आदानप्रदान गरी निर्माणका क्रममा कुनै समस्या आए तत्काल समाधान गर्ने सहमति पनि गरेको छ । ‘निर्माण अवधिको गणना आजकै मितिदेखि सुरु भएको छ,’ निगमका प्रवक्ता मनोजकुमार ठाकुरले भने, ‘बैठकले पाइप लाइन सञ्चालन र समस्या आए तत्काल समाधान गरेर बाटो देखाउने सहमति गरेको छ ।’
उनका अनुसार पाइप लाइन बनाउने जग्गामा बाउन्ड्री चाँडै सक्ने र आईओसीलाई हस्तान्तरण गर्नेबारे छलफल भएको छ । ‘निगमले हस्तान्तरण गरेलगत्तै आईओसी टेन्डरमा जानेछ,’ उनले भने ।
दोस्रो चरणको पेट्रोलियम पाइप लाइन विस्तार गर्न भारतसँग १५ अर्बका दुई वटा पाइप लाइन र एउटा स्मार्ट ग्रिनफिल्ड टर्मिनल बनाउने सम्झौता भइसकेको छ । यी परियोजना भारतले अनुदानमै बनाइदिने गरी सम्झौता भइसकेको छ ।
भारतको सिलिगुडीदेखि नेपालको झापास्थित चारआलीसम्म ५० किमि लामो पेट्रोलियम पाइप लाइन र चारआलीमै १८ हजार ९ सय किलोलिटर क्षमताको स्माट ग्रिनफिल्ड टर्मिनल बनाइदिने सम्झौता भएको हो ।
झापामा निगमको करिब २३ बिघा जग्गा छ । पाइप लाइन बनेसँगै त्यहाँ पेट्रोल र डिजेल भण्डारण गरिनेछ । त्यस्तै, नेपालको अमलेखगन्जबाट चितवनको लोथरसम्म ६२ किमि लामो पेट्रोलियम पाइप लाइन परियोजना पनि बनाउने सम्झौता भएको छ । यो पाइप लाइन पनि भारतले अनुदानमै बनाइदिनेछ ।
स्टेरिङ कमिटीको यो दोस्रो बैठक हो । पहिलो बैठक २०२४ अक्टोबर १४ अक्टोबरमा अनलाइनमार्फत भएको थियो । निगमको इन्जिनियरिङ परियोजना तथा सूचना प्रविधि विभाग निर्देशक विनितमणि उपाध्यायले स्टेरिङ कमिटीको बैठक नियमित गर्ने सहमति भएको बताए ।
बैठकमा निगमका तर्फबाट नायब कार्यकारी निर्देशक वीरेन्द्र गोइत, नायब कार्यकारी निर्देशक दीपक बराल, इन्जिनियरिङ परियोजना तथा सूचना प्रविधि विभाग निर्देशक उपाध्यायलगायत सहभागी थिए । आईओसीका तर्फबाट नेपालका कन्ट्री म्यानेजर निरुपम रायजादासहित अनिरुद्ध थाटे, प्रवीनकुमार सहभागी थिए ।
