— देशमा क्रिकेट माहोल ह्वात्तै बढेको छ । राजधानीमा भइरहेको नेपाल प्रिमियर लिग (एनपीएल) मा क्रिकेटप्रेमीहरू झुम्मिएका छन् । क्रिकेटको यो सुखद माहोलमा खड्किने विषय हो स्तरीय रंगशालाको अभाव । चितवन भरतपुरमा निकै चर्चाका साथ बन्न सुरु भएको गौतम बुद्ध क्रिकेट रंगशालाको अवस्था अहिले के होला ? सोमबार मध्यान्ह त्यहाँ पुग्दा कामदारहरू खान खाएपछि काममा जुट्न सुरु गर्दै थिए ।
‘अहिले १३ प्रतिशत काम भएको छ,’ परियोजनाको स्ट्रक्चरल इन्जिनियर रञ्जित साहले भने । निर्माण व्यवसायीसँग गत असार २३ मा ३० महिनाभित्र काम सक्ने गरेर सम्झौता भएको थियो । सम्झौताको ६ महिना पूरा हुँदा भएको प्रगति सन्तोषजनक नै रहेको इन्जिनियर साहले सुनाए । ७८ करोड ५० लाख ९१ हजार रुपैयाँमा रंगशाला निर्माणको काम भइरहेको छ ।
यो लागतभित्र १६ हजार दर्शक अटाउने प्यारापिट, मैदान र दुइटा टावर बन्नेछन् । एउटा टावरमा विशिष्ट व्यक्ति र मिडियाका लागि हुनेछ । अर्को टावर खेलाडी, प्रशिक्षक र त्यससँग सम्बन्धित व्यक्तिहरू बस्न प्रयोग गरिने साहले बताए । अहिले प्यारापिट ढलानका लागि तयारी सुरु भएको छ । निर्माण कम्पनीका तर्फबाट प्रोजेक्ट म्यानेजर वीरेन्दकुमार यादवले समयमै काम सक्ने गरेर अगाडि बढिरहेको बताए ।
‘सम्झौताको ३० महिनाभित्र सक्ने भन्ने हो । अहिले १५० देखि १७५ कामदारले काम गरिरहेका छन् । काम अगाडि बढेसँगै कामदारहरू पनि थपिँदै जानेछन् । अहिले एक सिफ्टमा मात्रै काम भइरहेको छ । पछि दुई सिफ्टमा पनि गरिने छ,’ यादवले भने । भरतपुर महानगरपालिकाको नेतृत्वमा प्रदेश र संघीय सरकारको सहयोगमा रंगशाला निर्माणको काम भइरहेको हो ।
२०७५ सालको माघ १६ गते चितवन रामपुरमा क्रिकेट रंगशाला बनाउने विषयमा काठमाडौंमा सम्झौतापत्रमा हस्ताक्षर भएको थियो । रामपुरमा त्रिभुवन विश्वविद्यालयको नाममा रहेको तर कृषि तथा वन विज्ञान विश्वविद्यालयले उपयोग गर्दै आएको २० विघा जमिनमा रंगशाला बन्दै छ । भरतपुर महानगरपालिकाले धुर्मुस–सुन्तली फाउन्डेशनसँग सहमति गरेर रंगशाला बनाउन लागेको थियो ।
जग्गा उपलब्ध गराएपछि फाउन्डेशनले देश विदेशका नेपालीसँग सहयोग जुटाएर करिब तीन अर्ब रुपैयाँको लागतमा दुई वर्षभित्रै रंगशाला बनाउने उद्घोष गरेको थियो । तर, सहयोग जुट्न सकस भएपछि फाउन्डेशनले २०७८ साल भदौदेखि काम बन्द गर्यो । सोही वर्षको पुस २ मा रंगशालाको स्वामित्व लिन फाउन्डेशनले महानगरलाई पत्र लेखेको थियो ।
काम सुरु गरेको वर्ष दिन नहुँदै विश्व नै प्रभावित हुने गरेर कोरोना महामारीको संक्रमण सुरु भयो । सोचेअनुरुप सहयोग नजुटेको, ५७ करोड १२ लाख रुपैयाँबराबरको काम हुँदा उधारोमा १८ करोड ४३ लाख रुपैयाँ रहेको भन्दै फाउन्डेशन रंगशाला निर्माणबाट अलग भयो । जुन ऋण अझै चुक्ता भएको छैन । गत वर्ष कात्तिक २१ मा महानगरपालिकाले वाग्मती प्रदेश सरकारसँग मिलेर रंगशाला निर्माणको काम पूरा गर्ने सहमति गर्यो ।
प्रदेश सरकार र महानगरबीच सहमति भएपछि गत वर्ष कात्तिक २३ मा संघीय सरकारले गौतम बुद्ध क्रिकेट रंगशालालाई राष्ट्रिय गौरवको आयोजनाका रूपमा अगाडि बढाउने निर्णय गर्यो । त्यसपछि विभिन्न प्रक्रिया पूरा गर्दै निर्माण कम्पनीसँग गत असारमा सम्झौता भएर काम अघि बढेको हो । फाउन्डेशनले रंगशालाको पिलर, प्यारापिट र मैदान निर्माणको काम सुरु गरिसकेको थियो ।
