— नेपाल र भारतबीच एसीसी महिला यू–१९ एसिया कप क्रिकेटको मंगलबारको खेल वर्षाका कारण रद्द भएको छ । यसअघि नै यी दुई टोली मलेसियामा भइरहेको प्रतियोगिताको ‘सुपर फोर’ मा पुगिसकेका थिए । नेपाल र भारत दुवैले समूह ‘ए’ को खेलमा पाकिस्तानलाई पराजित गरेको थियो ।
भारतले टस जितेपछि ब्याटिङ निम्तो पाएको नेपालले निर्धारित २० ओभरमा ८ विकेट गुमाई ९४ रन बनाएको थियो । कप्तान पूजा महतोले सर्वाधिक २५ रन बनाइन् । उनले ४० बल खेल्दै ३ चौका प्रहार गरिन् । एलिसा यादवले ९ बल खेलेर ४ चौकासहित अविजित २० रन बनाइन् । अन्यले दोहोरो स्कोर बनाउन सकेनन् ।
सना प्रविन ९, सावित्री धामी ३, सोनी पाख्रिन ८, ज्योत्स्निका मरासिनी ६, सीमाना केसी शून्य, अनु कडायत र कुसुम गोदार समान १ रनमा आउट भए ।
रिया शर्मा ३ रनमा अविजित रहिन् । भारतकी पारुनिका सिसोडिआले ४ ओभरमा १२ रन खर्चेर ४ विकेट लिइन् । भारतले ३.१ ओभरमा विनाक्षति २८ रन बनाएको अवस्थामा वर्षाले खेल बिथोलिएको थियो । नेपालले ‘सुपर फोर’ मा बिहीबार श्रीलंका र शुक्रबार बंगलादेशसँग खेल्नेछ ।
