— उपप्रधानमन्त्री एवं सहरी विकासमन्त्री प्रकाशमान सिंहले जनताको अवस्थामा सुधार ल्याउनका लागि सरकारले प्रयास गरिरहेको बताएका छन् । मकवानपुरको थाहा नगरपालिकामा शनिबार आयोजित कार्यक्रममा उपप्रधानमन्त्री सिंहले मुलुकमा राजनीतिक स्थायित्वसँगै जनताको अवस्थामा सुधार ल्याउने कार्यमा सरकार लागिरहेको बताएका हुन् ।
मुलुकको विकासका लागि तीनै तहका सरकारले मिलेर काम गर्नुपर्ने र जनताले पनि आवाज उठाइरहनुपर्ने उपप्रधानमन्त्री सिंहको भनाइ थियो । 'राजनीतिक स्थायित्व दिनका लागि यो सरकार बनेको हो । अहिले हामीले जनताको अवस्था जस्तोसुकै भए पनि यसमा सुधार ल्याउनका लागि सरकारबाट प्रयास भइरहेको छ,' उनले भने, 'विकास निर्माणको कार्यमा जनतादेखि सबै दल र तीनवटै तहका सरकार मिलेर लाग्दा राम्रो हुन्छ ।'
जनप्रतिनिधिले मात्रै चाहेर विकास निर्माणका कार्य सम्पन्न नहुने भएकाले तीनवटै तहका सरकार, जनप्रतिनिधि र जनता मिलेर अघि बढ्नुपर्ने उपप्रधानमन्त्री सिंहको भनाइ थियो । निर्वाचनका बेला आ-आफ्ना एजेन्डा लिएर प्रतिस्पर्धामा गए पनि पदमा निर्वाचित भइसकेपछि सबै जनताका लागि काम गर्नुपर्ने उनको आग्रह थियो । उनको भनाइ थियो, 'जनप्रतिनिधिलाई राम्रो काम गराउनका लागि स्थानीय बासिन्दाको महत्त्वपूर्ण भूमिका रहन्छ ।'
पछिल्लो समय मुलुकमा विकास नभएको भन्ने भाष्यमा सत्यता नभएको उपप्रधानमन्त्री सिंहको भनाइ थियो । २०४६ सालपछिको राजनीतिक परिवर्तनसँगै मुलुकमा विकासको कार्य अगाडि बढेको उनले बताए । मुलुकमा पछिल्लो समय विकास निर्माणका कार्य जनताले चाहेको मात्रामा नभए पनि क्रमशः विकास भने भइरहेको उनको भनाइ थियो । व्यवस्था परिवर्तन भयो तर जनताको अवस्था परिवर्तन भएन भन्ने कुरामा सत्यता नभएको उनले बताए ।
उपप्रधानमन्त्री सिंहले गणेशमान सिंहले शिलान्यास गरेको चन्द्रागिरी-चित्लाङ सडकको अवलोकन पनि गरेका थिए । सडक निर्माण कार्य सुरु भएको लामो समयसम्म सम्पन्न नभएको भन्दै उनले त्यसका लागि आफूले पहल थाल्ने बताए । 'यो राजधानीसँग जोड्ने सबैभन्दा छोटो मार्ग मात्र नभएर वाग्मती प्रदेशको राजधानी जोड्ने मार्ग पनि भएकाले यसको आकर्षण बेग्लै किसिमको हुन्छ भन्ने लागेको छ,' उनले भने ।
कांग्रेस वाग्मती प्रदेश सभापति एवं प्रदेश सभा सदस्य इन्द्र बानियाँले मकवानपुरका जनताको अवस्था सुधार्न र मकवानपुरलाई विकासको गतिमा अघि बढाउनका लागि पहल गर्ने बताएका थिए ।
