— मकवानपुरले दुई स्थानबाट गाँजासहित तीन जनालाई पक्राउ गरेको छ । मकवानपुर प्रहरीले हेटौंडा उपमहानगरपालिका–१९ नेवारपानीबाट लागूऔषध गाँजासहित २ जनालाई पक्राउ गरेको छ ।
धादिङको रोराङ गाउँपालिका–२ ताल्तीका ३५ वर्षीय सोमिलाल चेपाङ र २० वर्षीय किशोर चेपाङलाई शुक्रबार १४ किलो ८ सय ३० ग्राम गाँजासहित पक्राउ गरिएको जिल्ला प्रहरी कार्यालय मकवानपुरले जनाएको छ ।
इलाका प्रहरी कार्यालय नेवारपानी मकवानपुरबाट खटिएको प्रहरी टोलीले नेवारपानीस्थित पूर्व-पश्चिम सडकखण्डमा चितवनबाट हेटौंडातर्फ आउँदै गरेको लु ३ ख १७४१ नम्बरको यात्रुवाहक बसलाई सुरक्षा जाँच गर्दा बसमा सवार उनीहरुको साथबाट लागूऔषध गाँजा बरामद गरेको हो ।
प्रहरीले सोमिलाल र किशोरले बोकेको झोलाभित्र लुकाइछिपाई ल्याइएको अवस्थामा १४ किलो ८३० ग्राम लागूऔषध गाँजा फेला पारेको जनाएको छ । लागूऔषध गाँजासहित सोमिलाल र किशोरलाई नियन्त्रणमा लिई थप अनुसन्धानका भइरहेको प्रहरीले जनाएको छ । जिल्ला अदालतवाट ५ दिनको म्याद थप अनुमति लिई अनुसन्धान कार्य भइरहेको प्रहरीले जनाएको छ ।
यसैगरी मकवानपुर प्रहरीले लागूऔषध गाँजासहित हेटौंडा उपमहानगरपालिका–१४, नयाँबस्तीका ३३ वर्षीय चन्द्रबहादुर गोलेलाई पक्राउ गरेको छ । विशेष सूचनाको आधारमा इलाका प्रहरी कार्यालय पशुपतिनगरबाट खटिएको प्रहरी टोलीले गोलेको घरबाट ५ केजी गाँजा बरामद गरेको जनाएको छ । गोलेलाई मकवानपुर जिल्ला अदालतबाट ३ दिनको म्याद अनुमति लिई अनुसन्धान गरिरहेको प्रहरीले जनाएको छ ।
