— तीन वर्षपछि हुने निर्वाचन कार्यक्रम तय गर्न एमाले र माओवादी केन्द्र आ-आफ्नो केन्द्रीय कमिटी बैठकको तयारीमा लागेका छन् ।एमालेको २०८० फागुन र माओवादीको २०८० माघयता केन्द्रीय कमिटी बैठक बसेको छैन । एमालेको पुस तेस्रो साता र माओवादीको पुस २१ मा केन्द्रीय कमिटी बस्ने भएको छ ।
एमालेले सरकारको कामकारबाहीको समीक्षा, संगठन सुदृढीकरण मुख्य मुद्दा छ भने माओवादीले संसद्मा प्रमुख प्रतिपक्षको सशक्त भूमिका र संगठन निर्माणको प्रस्ताव तयार गर्दैछ ।
एमालेभित्र सरकारले अपेक्षित काम गर्न नसकेको चर्चा हुन थालेको छ । सरकारको काम प्रभावकारी बनाउने विषयमा एमाले अध्यक्ष केपी शर्मा ओलीले निकट नेतासँग छलफल जारी राखे पनि परिणाम आउन सकेको छैन ।
राजनीतिक दलहरुले आगामी निर्वाचनलाई लक्षित गरी कार्यक्रम बनाउन केन्द्रीय कमिटी बैठक गर्दैछन् । पुराना दललाई नयाँ उदाएका दलको दबाब पार्न थालेपछि उनीहरु तीन वर्षअघि नै बैठक गरी निर्वाचनकेन्द्रित कार्यक्रम गरी मतदातासमक्ष पुग्ने तयारी गरेका छन् । पुराना दलप्रति मतदाताको ठूलो गुनासो आइरहेका बेला उनीहरु घरदैलोमा पुगेर आफ्ना कुरा बताउने गरी कार्यक्रम तयार गर्न लागेको नेताले बताएका छन् ।
यही साता एमालेले दुई दिन राष्ट्रिय कार्यशाला गरी वडा तहसम्म पुग्ने संकल्प गरेको छ । त्यही कार्यक्रमलाई अनुमोदन र थप योजना बनाउन केन्द्रीय समिति बैठक गर्न लागेको प्रचार विभाग प्रमुख राजेन्द्र गौतमले बताए । ‘केन्द्रीय कमिटीले मिसन ०८४ लाई सफल बनाउने गरी थप कार्यायोजना बनाउने छ’, उनले भने, ‘अहिले त्यसको तयारी हुँदैछ ।’ उनले केन्द्रीय कमिटी बस्नुअघि सचिवालय र त्यसपछि स्थायी समिति बैठक गरी प्रस्ताव तयार गरिने बताए ।
स्थानीय तहको उपनिर्वाचनमा एमालेले अपेक्षित नतिजा नल्याएपछि त्यसको गम्भीर समीक्षा गरी कार्यक्रम बनाउने निर्णय यसअघि सचिवालय बैठकले गरिसकेको छ । उपनिर्वाचनमा माओवादीभन्दा पछि परेपछि एमालेले संगठन विभाग प्रमुखले दुई दिने कार्यशाला गरी सबै पालिकासम्म तीन महिने अभियान चलाउने संकल्प प्रस्ताव पारित गरेको छ ।
कार्यशालाले आधारभूत तहसम्म कमिटी निर्माण गरी निष्क्रिय सदस्यहरुको सदस्यता नवीकरण गर्ने निर्णय गरेको थियो । हाल तीन लाख संगठित सदस्य भएकोले त्यसलाई बढाउने गरी कार्यक्रम तय गरेको छ । ‘युवाहरुलाई नयाँ सदस्य बनाउने र पुरानालाई सक्रिय बनाउने मुख्य नीति छ,’ गौतमले भने, ‘त्यहीअनुसार सदस्यता नवीकरण अभियानको रुपमा चलाइने छ ।’
माओवादीको केन्द्रीय समिति बैठक नबसेको माघमा एक वर्ष पुग्दैछ । फागुनमा विधान सम्मेलन गरेको माओवादीले त्यसयता पदाधिकारी, स्थायी कमिटी बैठक गरी आवश्यक निर्णय गर्दै आएको छ ।
माओवादी अध्यक्ष पुष्पकमल दाहाल केन्द्रीय समितिका लागि राजनीतिक प्रतिवेदन लेख्न सुरु गरेका छन् । स्वकीयसचिव रमेश मल्लले पुस २१ देखि सुरु हुने केन्द्रीय समितिमा प्रस्तुत हुने प्रतिवेदन लेख्न सुरु भएको जानकारी दिए ।
‘यो केन्द्रीय समितिले संगठन सुदृढीकरणमा कार्यदिशा बनाएर कार्यक्रम बनाउनेछ,’ माओवादी प्रवक्ता अग्निप्रसाद सापकोटाले भने, ‘माओवादी सत्तातिर होइन, जनतातिर फर्कनुपर्छ भन्ने मुख्य नीति हो ।’
स्थानीय तह उपनिर्वाचनमा पालिका प्रमुख, उपप्रमुख र वडाध्यक्ष गरी चार सिट बनाएपछि उत्साहित भएको माओवादीले केन्द्रीय समितिले मुख्यगरी मतदाताकेन्द्रित कार्यक्रम बनाउने तयारी गरेको छ । यो उपनिर्वाचनमा माओवादीले ११ सिट जितेको छ ।
कांग्रेस-एमाले गठबन्धन बनेपछि संघ र प्रदेश सरकारबाट बाहिरिएको माओवादीले आफूले नेतृत्व गरेको सरकारले सुशासन र भ्रष्टाचारविरोधी अभियानलाई पुनः कार्यक्रम बनाउने तयारी छ । ‘माओवादी सुशासन, भ्रष्टाचारविरुद्ध छ भन्ने कुरा जनतासमक्ष थप सन्देश लिएर जान्छौं,’ सापकोटाले भने ।
माओवादी केन्द्रीय समितिमा पार्टीभित्रको अन्तरसंघर्षलाई व्यवस्थापन गर्न छलफल सुरु भएको छ । अध्यक्ष पुष्पकमल दाहालको नेतृत्व हस्तान्तरण, कार्यशैली रुपान्तरण हुनुपर्ने भन्दै उपमहासचिव जनार्दन शर्माले फरक मत राखेपछि अन्तरसंघर्ष चर्किएको थियो । त्यो अन्तरसंघर्ष अझै व्यवस्थापन भएको छैन । प्रदेश समितिहरुमा उनको फरक मतमाथि बहस भए पनि टुंगोमा पुगेको छैन । ‘आगामी केन्द्रीय समितिमा अन्तरसंघर्ष व्यवस्थापनको विषय पनि प्रमुख छ,’ एक पदाधिकारीले भने ।
