— मोटरसाइकल चोरीको अभियोगमा रूपन्देही प्रहरीले ६ जना युवालाई पक्राउ गरेको छ ।
पक्राउ पर्नेमा रूपन्देहीको सियारी गाउँपालिका–२ निवासी २६ वर्षीय शिव जयसवाल, १९ वर्षीय गणेश राजभर, २० वर्षीय शनि भर, २४ वर्षीय शिवकुमार मल्लाह र २४ वर्षीय अनिल यादव छन् । यसै गरी, पाल्पाको माथागढी गाउँपालिका–७ घर भई हाल बुटवल उपमहानगरपालिका–१३ बस्ने २४ वर्षीय अर्जुन परियार पनि पक्राउ परेका छन् ।
जिल्ला प्रहरी कार्यालय रूपन्देहीका डीएसपी तथा प्रवक्ता सुरज कार्कीले मोटरसाइकल चोरी गरेको प्रमाणसहित उनीहरुलाई पक्राउ गरी अदालतद्वारा कारबाही अघि बढाइएको बताए ।
‘हराएका मोटरसाइकल विभिन्न स्थानमा चेकजाँच र खोजतलास गर्ने क्रममा उनीहरूलाई फरक–फरक मितिमा पक्राउ गरिएको हो,’ डीएसपी कार्कीले भने, ‘अहिलेसम्मको प्राप्त प्रमाण र अनुसन्धानलाई हेर्दा उनीहरू पेसेवर रूपमा मोटरसाइकल चोरीमा संलग्न रहेको खुलेको छ ।’
मोटरसाइकल चोरीका घटना बढ्न थालेपछि प्रहरीले रूपन्देहीमा ‘क्लिन स्विप अपरेसन’ सुरु गरेको छ । चोरी भएका मोटरसाइकल खोजतलास गर्ने, चोरीमा संलग्न व्यक्तिको पहिचान र नियन्त्रण गरी कारबाही गर्नका लागि अभियान दुई हप्तादेखि अभियान संचालन गरिएको डीएसपी कार्कीले बताए ।
