— जर्मनीको पूर्वी सहर माग्डबर्गको क्रिसमस बजारमा तीव्र गतिको कार अन्धाधुन्ध गुडाउँदा कम्तीमा दुई जनाको ज्यान गएको छ । ६८ जना घाइते छन् । घाइतेमध्ये कम्तीमा १५ जनाको अवस्था गम्भीर रहेको अधिकारीहरूले जनाएका छन् ।
प्रत्यक्षदर्शीहरूले उक्त आक्रमणपछिको अवस्था निकै भयावह रहेको बताएको बीबीसीले जनाएको छ ।
मानिसहरूको भीडमा गुडेको कार करिब ४ सय मिटर पर पुगेपछि मात्र रोकिएको थियो । साक्सनी अनहल्ट राज्यका प्रमुख रेइनर हाजेलअफले साउदी अरबका ५० वर्षीय चिकित्सक सन्दिग्ध आक्रमणकारी रहेको जनाएका छन् ।
ती चिकित्सकलाई प्रहरीले नियन्त्रणमा लिएको छ । १८ वर्षदेखि जर्मनीमा बसिरहेका ती सन्दिग्धसँग स्थायी आवास अनुमति रहेको प्रहरीले जनाएको छ । स्थानीय अधिकारीहरूले आक्रमण नियतवश गराइएको आशंका गरेका छन् । उनी हालसम्म भने कुनै इस्लामिक अतिवादी समूहमा संलग्न नभएको प्रहरीले जनाएको छ ।
प्रतिआतङ्कवादसम्बन्धी एक विज्ञले भने उक्त घटनामा ठूलो सञ्जालको संलग्नता नरहेको ठोकुवा गरिहाल्न छिटो हुने बताएका छन् । युरोपमा यसअघि अल-कायदा वा इस्लामिक स्टेट समूहबाट प्रभावित युवाहरूले यस्ता आक्रमण गर्ने गरेका थिए ।
जर्मन चान्सलर ओलाफ सोल्ज शनिबार घटनास्थल जाने बताइएको छ । साउदी अरबको विदेश मन्त्रालयले उक्त आक्रमणको निन्दा गरेको छ । फ्रान्सका राष्ट्रपति इमानुएल म्याक्रोंले घटनाप्रति दु:ख व्यक्त गरेका छन् ।
जर्मनीमा क्रिसमसको मेलामा गाडीको हमलाबाट मानिसहरूको मृत्यु भएको यो पहिलोपटक होइन । आठ वर्षअघि कट्टरपन्थी सम्बद्धता भएका एक जना व्यक्तिले बर्लिन सहरको क्रिसमस मेलामा गराएको आक्रमणमा १२ जनाको ज्यान गएको थियो । जर्मनीमा शरण पाउन विफल भएका ती व्यक्तिले गराएको आक्रमणमा ४९ जना घाइते भएका थिए ।
सन् २०१८ मा फ्रान्सको स्ट्रासबर्गको क्रिसमस बजारमा एक बन्दुकधारीले गरेको आक्रमणमा ५ जनाको ज्यान गएको थियो । त्यस्तै, सन् २०१६ मा फ्रान्स निस सहरमा आयोजित बास्टिल डे समारोहमा लरी ठोक्काइएको थियो । उक्त घटनामा ८६ जनाको ज्यान गएको थियो ।
