— गृहमन्त्री रमेश लेखकले सहकारी ठगीमा भइरहेको अनुसन्धानलाई प्रभाव पार्न विभिन्न पार्टीका मानिसले जथाभावी बोल्दै हिँडेको टिप्पणी गरेका छन् । उनले अपराधमा संलग्न देखिए जोसुकै व्यक्ति पनि कानुनी कारबाहीको दायरामा आउनेसमेत बताएका छन् ।
इलाका प्रशासन कार्यालय रामपुर, पाल्पाको नवनिर्मित भवनको बुधबार उद्घाटनका क्रममा मन्त्री लेखकले रास्वपाका नेता–कार्यकर्तातर्फ इंगित गर्दै सहकारी ठगीसम्बन्धी अनुसन्धानलाई प्रभावित पार्न खोजेको बताएका हुन् ।
‘अनुसन्धानको दायरामा ल्याउनलाई ठूलो वा सानो मान्छे भन्ने हुँदैन । जोसुकैलाई अनुसन्धानको दायरामा ल्याइन्छ,’ उनले भने । गृहमन्त्री लेखकले भ्रष्टाचार समाप्त गरेर सुशासन कायम गर्न कांग्रेस–एमालेको गठबन्धन सरकार बनेको बताए ।
उनले शान्ति सुरक्षा कायम गर्न सरकार प्रतिबद्ध रहेको समेत उल्लेख गरे । ‘शान्ति सुरक्षा र अमनचयन भएन भने विकास निर्माणदेखि लिएर सबै क्षेत्रमा असर पर्छ,’ उनले भने ।
गृहमन्त्री लेखकले इलाका प्रशासन कार्यालयबाट राहदानी सेवा र राष्ट्रिय परिचयपत्रको सेवासमेत शुभारम्भ गरे । त्यस क्रममा उनले कर्मचारी वा कुनै सामग्रीको अभावले सेवा रोकिने अवस्था नआउने बताए । नागरिकलाई सरल र सहज ढंगले सेवा प्रदान गर्न आवश्यक कर्मचारी व्यवस्थापन हुने उनको भनाइ थियो ।
पाल्पा सदरमुकाम तानसेनदेखि ७० किलोमिटर पूर्वको रामपुर नगरपालिकामा रहेको इलाका प्रशासन कार्यालय २०७३ सालदेखि भाडाको भवनमा सञ्चालन हुँदै आएको थियो । चार करोड ६८ लाख ६८ हजार ८ सय ५३ रुपैयाँ लागतमा १४ कोठाको साढे २ तले भवन निर्माण भएपछि त्यसमा कार्यालय सरेको छ ।
कार्यक्रममा प्रतिनिधिसभा सदस्य नारायण आचार्यले रामपुर क्षेत्रको विकासका लागि इलाका प्रशासन कार्यालयसँगै इलाका प्रहरी कार्यालयमा प्रहरी नायब उपरीक्षकको दरबन्दीको माग गरेका थिए । राष्ट्रिय सभा सदस्य राजेन्द्रलक्ष्मी गैरेले रामपुर क्षेत्रमा बसाइँसराइ गरेर आउनेको संख्या बढेकाले सेवासुविधा थप्दै लानुपर्नेमा जोड दिए ।
लुम्बिनी प्रदेशसभा सदस्य राजु श्रेष्ठले रामपुर क्षेत्रलाई रोल्पासम्म जोड्ने गरी सडक निर्माणको काम अघि बढेको उल्लेख गर्दै नागरिकलाई जतिसक्दो धेरै सुविधा दिन लागिपरेको बताए । लुम्बिनी प्रदेशसभाका अर्का सदस्य वीरबहादुर रानाले नागरिकले सेवासुविधा नपाएको गुनासो सुन्न नपर्ने अवस्था आउनुपर्ने बताए ।
