— जनकपुर बोल्ट्सका लाहिरु मिलान्था नेपाल प्रिमियर लिग (एनपीएल) क्रिकेटको पहिलो सिजनमा उच्च स्कोरर बनेका छन् । फाइनलमा सुदूरपश्चिम रोयल्सविरुद्ध निर्णायक इनिङ्स खेलेपछि मिलान्थाले रबि बोपारा, रोहित पौडेललाई उछिनेका हुन् ।
फाइनलको दोस्रो इनिङ्स अगाडि सर्वाधिक रन बनाउनेमा मिलान्थाभन्दा माथि चितवन राइनोजका बोपारा, लुम्बिनी लायन्सका कप्तान रोहित, सुदूरपश्चिमका सैफ जैब, जनकपुरकै जिम्मी निशम र सुदूरपश्चिमका विनोद भण्डारी अगाडि थिए ।
बोपाराले ८ खेलमा २ सय ८६ रन बनाएका थिए । उनको टोली चितवन इलिमिनेटरमा कर्णाली याक्ससँग पराजित भएको थियो । अंक तालिकाको पुछारमा रहेको लुम्बिनीबाट रोहितले ७ खेलमा २ सय ७९ रन बनाएका थिए । फाइनलको इनिङ्सले जैबको कुल स्कोर २ सय ७५, विनोदको स्कोर ३५ रनमा पुर्याएको थियो ।
फाइनलअघि मिलान्थाको २ सय ६ रन थियो । फाइनलमा ४९ बलमा ८७ रन बनाएपछि मिलान्था २ सय ९३ रनसहित एनपीएलको सर्वाधिक रनकर्ता बनेका हुन् । मिलान्थाले एनपीएलको पहिलो खेलमा विराटनगर किंग्सविरुद्ध ५३ बलमा अविजित ७५ रन बनाएका थिए । मिलान्थाले १३० माथिको स्ट्राइक रेटमा सो रन बनाएका हुन् ।
फाइनलमा निशमले ४ रनमात्र बनाउन सके र उनको कुल स्कोर २ सय ४७ रन पुगेको थियो ।
ललित र कुग्लेन उच्च विकेटकर्ता
जनकपुर बोल्ट्सकै ललित राजवंशी र सुदूरपश्चिमका स्कट कुग्लेन समान १७ विकेटसहित एनपीएलको पहिलो सिजनमा सर्वाधिक विकेट लिने खेलाडी बनेका छन् । फाइनलअघि दुवैको समान १६ विकेट रहेको थियो ।
सुदूरपश्चिमले फाइनलमा आक्रामक सुरुआत गर्दै २ ओभरमा २८ रन जोडेपछि ललित जनकपुरको आक्रामण मोर्चा सम्हाल्न आइपुगेका थिए । आफ्नो पहिलो ओभरमा ४ रनमात्र खर्चेका उनले पाँचौं ओभरमा मेडन फालेर सुदूरपश्चिमको रनमा अंकुश लगाएका थिए ।
१३ औं ओभरमा आफ्नो तेस्रो ओभर लिएर आएका ललितले सो ओभरको दोस्रो बलमा विनोद भण्डारीलाई ४१ रनमा बोल्ड गरेका थिए । उनले आफ्नो पहिलो ३ ओभरमा ८ रनमात्र खर्चेका थिए । १७ औं ओभरमा आफ्नो चौथो ओभरमा केवल ७ रनमात्र खर्चेका ललितले ४ ओभरमा १ मेडन राख्दै १५ रन खर्चेर १ विकेट लिए ।
कुग्लेनको प्रदर्शन त्यसको विपरीत रहेको थियो । उनको पहिलो दुई ओभरमा जनकपुरले २८ रन प्रहार गरेको थियो । १७ औं ओभरमा कुग्लेनले लाहिरु मिलान्थाको विकेट लिए पनि जनकपुर त्यत्तिखेर विजयको नजिक पुगिसकेको थियो । तर उनले सो ओभरमा दुई वाइड चौकासहित १५ रन खर्चन पुगेका थिए ।
औषतमा ललितभन्दा कुग्लेन अगाडि रहे । कुग्लेनले ९ खेलमा १२.३५ को औषत र ललितले १० खेलमा १२.५२ को औषतमा विकेट लिएका हुन् । चितवन राइनोजका सोहेल तनवीर र जनकपुरका किशोर महताले समान १४, कर्णाली याक्सका विपिन शर्मा र चितवनका रिजन ढकालले समान १३ तथा सुदूरपश्चिमका सैफ जैब, काठमान्डु गुर्खाजका करण केसी र जनकपुरमा मोहम्मद मोहसिनले समान १२ विकेट लिए ।
