— ग्याब्रिएल जेससले दुई गोल गरेपछि आर्सनलले इंग्लिस प्रिमियर लिगमा क्रिस्टल प्यालेसमाथि ५–१ को प्रभावशाली जित निकालेको छ । यो जितपछि आर्सनलले लिग तालिकाको शीर्षमा रहेको लिभरपुलसँगको दूरी तीन अंकमा छोट्याएको छ र तेस्रोमा छ ।
आर्सनलको १७ खेलबाट ३३ अंक छ । लिभरपुलको दुई खेल कम खेलेको छ र ३६ अंक छ । चेल्सी भने १६ खेलबाट ३४ अंकमा दोस्रोमा रहेको छ । सेलहर्स्ट पार्कमा भएको खेलमा आर्सनलका लागि काइ हार्भटेज, ग्याब्रिएल मार्टिनेली र डेक्लान राइसले पनि गोल गरे ।
यो जित आर्सनलका लागि महँगो भने सावित भयो र उसका प्रमुख खेलाडी बुकायो साका चोटग्रस्त हुँदै पहिलो हाफमै मैदान छाड्न बाध्य रहे । शनिबारका अन्य खेलमा नटिङघम फरेस्टले ब्रेन्टफोर्डलाई २–० र न्युकासल युनाइटेडले इपस्विच टाउनलाई ४–० ले हरायो ।
यस्तै वेस्ट ह्याम र ब्राइटनले १–१ को बराबरी खेले । शनिबारको पहिलो खेलमा भने एस्टन भिल्लाले म्यानचेस्टर सिटीलाई २–१ ले हरायो । यससँगै सिटीको खराव लय कायम रह्यो र प्रशिक्षक पेप ग्वार्डिओलामाथि पनि चर्को दबाब कायम रह्यो ।
सिटी लिगका पछिल्ला आठ खेलमध्ये एकमा विजयी रहेको छ भने एक बराबरीमा टुग्याएको छ । त्यस बाहेक बाँकी छ खेलमा भने पराजित रहेको छ ।
