— भारतले एसीसी महिला यू-१९ एसिया कपको उपाधि जितेको छ । आइतबार बंगलादेशलाई ४१ रनले हराउँदै भारतले उपाधि जितेको हो ।
मलेसियाको क्वालालुम्पुरस्थित बायुमास क्रिकेट ओभलमा भारतले दिएको ११८ रनको लक्ष्य पछ्याउने क्रममा बंगलादेश १८.३ ओभरमा १० विकेट गुमाउँदै ७६ रनमा समेटिएको थियो ।
बंगलादेशका लागि जुअैरिया फिरदोसले २२ रन बनाउँदा फाहोमिया चोयाले १८ रज बनाए । बंगलादेशका लागि अन्य ब्याटरले भने दोहोरो अंकमा रन बनाउन सकेनन् । भारतका लागि आयुशी शुक्लाले ३ विकेट लिइन् । त्यस्तै पारुनिका सिसोदिया र सोनम यादवले २/२ विकेट लिए ।
त्यसअघि टस हारेर पहिले ब्याटिङको निम्तो पाएको भारतले २० ओभरमा ७ विकेट गुमाउँदै ११७ रन बनाएको थियो । भारतका लागि गोंगदी त्रिशाले सर्वाधिक ५२ रन बनाइन् । त्यस्तै मिथिला विनोदले १७ रन बनाइन् । बंगलादेशका लागि फरजाना यास्मिनले ४ विकेट लिइन् । त्यस्ति निशिता अख्तर निशीले २ विकेट लिँदा हबिबा इस्लामले १ विकेट लिइन् ।
प्रतियोगितामा पाकिस्तानविरुद्ध ऐतिहासिक जित हात पारेको नेपाल भने सुपर-४ बाटै बाहिरिएको थियो ।
