। ‘ओपेनहाइमर’बाट गतवर्ष सर्वोत्कृष्ट निर्देशकको रुपमा अस्कर अवार्ड जितेका निर्देशक क्रिस्टोफर नोलनको नयाँ फिल्मको नाम ‘द ओडिसी’ तय भएको छ ।
यो फिल्म ग्रीक साहित्यका महान होमरको प्रसिद्ध कविता ‘द ओडिसी’मा आधारित छ, जुन ईसापूर्व ८ औं शताब्दीमा लेखिएको थियो । आइम्याक्स प्रविधि प्रयोग गरी विश्वका विभिन्न स्थानमा फिल्मको छायांकन गरिनेछ । हलिउड स्टुडियो युनिभर्सलले मंगलबार यो फिल्मबारे घोषणा गरेको छ ।
यो फिल्मको प्रदर्शन १७ जुलाई, २०२६ मा हुने जनाइएको छ । यो कविता ग्रीक कवि होमरद्वारा लेखिएको विश्वचर्चित रचना हो । यसले इथाकाका राजा ओडिसियसको कथाबारे भन्छ, जसले ट्रोजन युद्धपछि घर फर्कने यात्रामा धेरै कठिनाइहरूको सामना गर्नुपरेको थियो ।
ओडिसियसले यस यात्रामा धेरै खतराको सामना गर्दछ जसमा प्रसिद्ध रूपमा साइक्लोप्स पोलिफेमस, साइरेन्स र जादूगरनी सर्सेहरू जस्ता घटना सामेल छन् । ओडिसियसले आफ्नी पत्नी पेनेलोपलाई भेटेर कथाको अन्त्य हुन्छ ।
ओडिसी पहिले धेरै पटक फिल्म र टेलिभिजनको लागि रुपान्तरित गरिएको छ । यसलाई सन् १९५४ इटालियन फिल्म युलिसिस र १९९७ मिनी–श्रृंखला द ओडिसीमा रूपान्तरण गरिएको थियो । राल्फ फिएनेस र जुलिएट बिनोचे हालै फिल्म द रिटर्नमा ओडिसियस र पेनेलोपको रूपमा देखिएका थिए ।
नोलनको यो नयाँ फिल्ममा म्याट डेमन, टम हल्यान्ड, एनी ह्याथवे, जेन्डाया, रोबर्ट प्याटिनसन, लुपिता न्योङओ र चार्लिज थेरोन जस्ता चर्चित कलाकार देखिनेछन् । छायांकन आउँदो वर्षको सुरुमा सुरु हुने बताइएको छ ।
यो युनिभर्सलका लागि नोलनको दोस्रो फिल्म हुनेछ । यसअघि उनको फिल्म ‘ओपेनहाइमर’ले दर्शकमा जादू छोडेको थियो । यो फिल्मले अस्करमा पनि सफलता हासिल गरेको थियो ।
