। म्यानचेष्टर सिटीका प्रशिक्षक पेप ग्वार्डिओलाले अर्को सिजनको च्याम्पियन्स लिगमा सिटी छनोट हुन नसक्ने खतरा रहेको प्रतिक्रिया दिएका छन् ।
यूरोपियन फुटबलको सबैभन्दा प्रतिष्ठित प्रतियोगिता च्याम्पियन्स लिगमा सिटीले लगातार १४ सिजन खेलेको छ । आर्सनलले सन् १९९८ देखि २०१७ सम्म र म्यानचेष्टर युनाइटेडले सन् १९९६ देखि २०१४ सम्म यूरोपियन प्रतियोगिता खेलेका थिए । इंग्लिस क्लबहरुमध्ये सिटीभन्दा लामो समय लगातार यूरोपियन प्रतियोगितामा सहभागी हुने दुई क्लब आर्सनल र युनाइटेड मात्र हुन् ।
हाल प्रिमियर लिगमा सिटी सातौं स्थानमा छ । १७ खेलबाट सिटीको २७ अंक छ । जुन चौथो स्थानको नटिङहम फरेस्ट भन्दा ४ अंक र पाँचौ स्थानको बर्नमाउथभन्दा १ अंकले पछि हो । छैटौं स्थानको एस्टन भिल्लाको पनि सिटी भन्दा १ अंक बढी छ ।
यूरोपियन च्याम्पियन्स लिगमा इंग्ल्याण्डबाट अर्को सिजन शीर्ष पाँचमा रहनेले खेल्नेछ । अहिलेको अवस्था अनुसार सिटी छनोट हुने सम्भावना केही कमजोर छ । ‘जब मैले पहिला भन्थे मानिसहरु हाँस्थे’ ग्वार्डिओलाले भने, ‘उनीहरु भन्थे कि च्याम्पियन्स लिगमा छनोट हुनु मात्र ठूलो सफलता होइन ।’
‘तर मलाई थाहा छ यो देश (इंग्ल्याण्ड) को क्लबमा यस्तो हुन्छ । उनीहरु धेरै वर्षसम्म हावी भएर पनि पछिल्लो समय धेरै वर्ष उनीहरु च्याम्पियन्स लिगमा छनोट भएका छैनन्’ उनले थपे ।
ग्वार्डिओलाको सिटीले बक्सिङ डे मा एभरटनसँग घरेलु मैदानमा खेल्दैछ । यस्तै २९ डिसेम्बरमा लेस्टर सिटीको भ्रमणमा निसक्नेछ भने ४ जनवरीमा वेष्टहमसँग घरेलु मैदानमा खेल्नेछ ।
सिटीको अबको खेल तालिकाको पूछारतिरको टिमसँग रहेकोले सिटीसामू प्रदर्शन सुधार गर्दै नतिजा ल्याउने अवसर छ । सिटीले पछिल्लो ८ खेलमा जम्मा ४ अंक मात्र जोडेको छ । त्यसैले पनि ग्वार्डिओलाले यूरोपियन प्रतियोगिता गुम्ने सम्भावना रहेको बताएका छन् ।
‘च्याम्पियन्स लिगमा पछिल्ला सिजनहरुमा खेल्ने एक टिम म्यानचेष्टर सिटी हो । तर अहिले हामी साँच्चै खतारमा छौं’ ग्वार्डिओलाले भने ।
आर्सनल, चेल्सी, लिभरपुल र म्यानचेष्टर युनाइटेडले २००६-०६ देखि २००८-०९ सिजनसम्म प्रिमियर लिगमा शीर्ष चार स्थान ओगटेका थिए । यी मध्ये कम्तीमा तीन क्लबले सन् २०१५ सम्म शीर्ष चारमा स्थान बनाएका थिए ।
तर युनाइटेडले पछिल्लो ११ सिजनमध्ये पाँच सिजन च्याम्पियन्स लिग बाहिर रहेको थियो । आर्सनलले पछिल्लो सिजन च्याम्पियन्स लिगमा पुनरागमन गर्नुअघि ६ सिजन च्याम्पियन्स लिगमा छनोट हुन सकेन ।
यस पटक सिटीलाई अप्रत्याशित रुपमा खतरा देखिएको हो । नटिङहम फरेस्ट र बर्नमाथउसिहत एस्टन भिल्ला सिटी भन्दा अंकतालिकामा अघि छ । न्यूक्यासल, फुलहम र ब्राइटन पनि सिटी नजिक छ ।
‘यस पटक धेरै क्लबहरु होडमा छन्’ ग्वार्डिओलाले भने । सिटीले सबैखाले प्रतियोगिता गरी पछिल्लो १२ खेलमा ९ खेल हारेको छ । ‘सबै क्लबका लागि यो महत्वपूर्ण छ कि यदि हामीले खेल जित्न सकेनौँ भने हामी निश्चित रुपमा बाहिर हुनेछौँ ।’
‘यदी हामी छनोट भएनौं भने त्यसको कारण हामी यसका लागि लायक थिएनौं भन्ने हुनेछ । किनकी हामी यसका लागि तयार थिएनौं र हामीसँग धेरै समस्याहरु छन् जुन हामीले सुधार गर्नुपर्छ’, ग्वार्डिओलाले भनेका छन् ।
