। सहकारी ठगी अभियोग भोगिरहेका रास्वपा सभापति रवि लामिछाने सांसद पदबाट निलम्बित भएसँगै कार्यवाहक सभापति डोलप्रसाद (डिपी) अर्यालले पार्टीभित्र सक्रियता बढाएका छन् ।
लामिछानेले पार्टीभित्र सन्तुलन मिलाउन अर्याललाई पार्टी संगठन, अर्का उपसभापति स्वर्णिम वाग्लेलाई संसदीय दलको नेतृत्वमा लैजाने इच्छा व्यक्त गरे पनि संसदमा अर्याल नै हाबी बन्ने देखिएको छ ।
बिहीबार अर्यालले पार्टीका सबै विभाग प्रमुखहरूलाई हालसम्मको प्रगति र आगामी योजनाबारे रिपोर्टिङ मागेका छन् ।
नेताहरूका अनुसार अर्यालले बिहीबार विभाग प्रमुखहरूलाई सन्देश पठाएर यही पुस २५ गते दिउँसो ४ बजेभित्र आफ्नो क्षेत्राधिकार र जिम्मेवारीमा केन्द्रित रहेर रिपोर्टिङ पेस गर्न भनेका छन् । स
मयसीमा नै तोकेर कार्यवाहक सभापति अर्यालले विभागका प्रमुखहरूसँग हालसम्मको प्रगति र आगामी योजना मागेका हुन् ।
रास्वपामा विभिन्न ३६ वटा विभागहरू छन् ।
संगठन विभाग प्रमुखमा कबिन्द्र बुर्लाकोटी, अभियान तथा प्रचार प्रसार विभागमा विपिन आचार्य, अन्तर्राष्ट्रिय सम्बन्ध विभागमा शिशिर खनाल प्रमुख छन् । प्रवास नेपाली सम्पर्क विभागमा डोलप्रसाद अर्याल नै प्रमुख छन् ।
मानवीय विकास प्रवर्द्धन विभागमा कुसुम महर्जन, उत्पादन प्रवद्र्धन विभागमा रामकृष्ण भट्टराई, केन्द्रीय विपद व्यवस्थापन सम्बन्धी द्रुतकार्य (आरएटी) संयोजन विभागमा विष्णु कुमार श्रेष्ठ, नेतृत्व क्षमता तथा मानव संशाधन विभागमा खुस्बु सरकार श्रेष्ठ, जनसम्पर्क विभागमा दीपक बोहरा, भ्रष्टाचार निवारण तथा सुशासन प्रवद्र्धन विभागमा हरि ढकाल प्रमुख छन् ।
आर्थिक व्यवस्थापन विभागमा लिमा अधिकारी, गुनासो व्यवस्थापन विभागमा डा चन्दा कार्की, विकास, योजना तथा नीति तर्जुमा विभागमा अरनिको पाडे, तथ्यांक अनुसन्धान तथा अभिलेखन विभागमा मनिष झा चयन प्रमुख छन् ।
विधेयक मन्थन विभागमा गणेश कार्की, गैरआवासीय नेपाली सम्पर्क विभागमा अर्जुन अधिकारी, कानुन तथा न्याय विभागमा सोविता गौतम र अर्थ नीति विभागमा डा. स्वर्णिम वाग्ले प्रमुख छन् ।
सार्वजनिक लेखा समीक्षा विभागमा मनिष झा, शिक्षा विभागमा सुमना श्रेष्ठ, स्वास्थ्य तथा जनसंख्या विभागमा डा. तोसिमा कार्की, कृषि विभागमा अशोक चौधरी प्रमुख छन् ।
पर्यटन तथा संस्कृति विभागमा शिशिर खनाल, मुद्रा तथा पुँजी बजार विभागमा बिराज भक्त श्रेष्ठ, उद्योग तथा वाणिज्य विभागमा गणेश पराजुली, श्रम तथा उपभोक्ता हित विभागमा असिम शाह, यातायात विभागमा शिव नेपाली प्रमुख छन् ।
पूर्वाधार अनुगमन विभागमा निशा डाँगी, युवा तथा खेलकुद विभागमा डा. तोसिमा कार्की, विज्ञान, सञ्चार तथा सूचना प्रविधि विभागमा सुमना श्रेष्ठ, मानव अधिकार विभागमा सन्तोष परियार, सहकारी विभागमा अशोक चौधरी, बन तथा वातावरण विभागमा विनीता कठायत र महिला तथा सामाजिक विकास विभागमा लक्ष्मी तिवारी प्रमुख छन् ।
नीति तथा विचार विभागको प्रमुखमा कार्यवाहक महामन्त्री कबिन्द्र बुर्लाकोटी छन् । सुरुमा डा. मुकुल ढकाल थिए । ढकाल पार्टीबाट कारबाहीमा परेसँगै यसको जिम्मेवारी बुर्लाकोटीमा सरेको हो । प्र
शिक्षण विभागको प्रमुखमा पनि बुर्लाकोटी नै प्रमुख छन् ।
विभागी प्रमुखहरूसँग रिपोर्टिङ लिएर पार्टीको गतिविधिलाई गति दिने अर्यालको तयारी छ । यसका लागि उनले शुक्रबार पार्टीको सचिवालय बैठक राखेका छन् ।
पार्टी केन्द्रीय कार्यालय चमतिमा शुक्रबार दिउँसो ३ बजे बस्ने बैठकमा बैठकमा समसामयिक राजनीतिक परिस्थितिको बारेमा छलफल हुनेछ । शुक्रबारको बैठकबाट पार्टीको आगामी रणनीति तय गर्न लागिएको नेताहरू बताउँछन् । यसका लागि पार्टीको केन्द्रीय विभागमा मनोनयमा हेरफेर गर्ने तयारी समेत रास्वपाको छ ।
रास्वपाका सभापति रवि लामिछानेविरूद्ध कास्की जिल्ला अदालतमा मुद्दा दर्ता भएपछि पार्टीको दोस्रोपटक सचिवालय बैठक बस्न लागेको हो । पार्टीको कार्यवाहक सभापतिमा अर्याल चयन भइसकेका छन् । रास्वपाको संसदीय दलको नेता पनि अर्याललाई नै बनाउने तयारी छ ।
नेताहरूका अनुसार डिपी अर्याललाई संसदीय दलको कार्यवाहक नेता बनाउँदा पार्टीमा विश्वासको अवस्था कायम रहने वातावरण छ । एक नेता भन्छन्, ‘डिपी अर्याललाई नै संसदीय दलको कार्यवाहक नेता बनाउने हो । अरु हुँदा प्रश्न उठ्छ । पार्टीका कार्यकर्तामा पनि शंका हुन्छ । यसकारण डिपीलाई नै दलको कार्यवाहक नेता बनाउने तयारी छ ।’
पार्टीका अर्का पदाधिकारीले दुई दिनअघि अनलाइनखबरसँग कुरा गर्ने क्रममा वाग्लेलाई संसदीय दलको नेतृत्व दिने मोटामोटी समझदारी भइसकेको, लामिछानेको पनि त्यस्तै इच्छा रहेको बताएका थिए । सहमहामन्त्री सुमना श्रेष्ठले भने फेसबुक ग्रुपमा आफूसमेत संसदीय दल नेताको उम्मेदवार बन्ने घोषणा गर्दै ‘टीका लगाउने प्रथा’ को विपक्षमा उभिन आग्रह गरेकी थिइन् । उनले हिरासतबाट पार्टी चलाउने रविको कार्यशैलीसँग सांकेतिक असन्तुष्टि समेत जनाएकी थिइन् ।
हाल संसदीय दल उपनेता रहेका विराजभक्त श्रेष्ठले आफू स्वतः दाबेदार रहेको बताउँदै आएका छन् । चन्दा कार्कीले पनि संसदीय दल नेता दाबी गर्दै अनौपचारिक छलफल थालेकी छन् ।
यही तानातानको बीचमा पार्टीको कार्यवाहक सभापति र संसदीय दलको कार्यवाहक नेता दुवै ठाउँमा अर्याल आएमा अनौठो नहुने रास्वपाकै नेताहरू बताउँछन् । अर्यालले आफूलाई अग्रसर तुल्याउँदै पार्टीका विभिन्न विभागसम्म छोटो अवधि राखेर रिपोर्ट माग्नुका पछाडि रास्वपाले यही कारण मुख्य रहेको बताएको छ ।
